रातो मछिन्द्रनाथको रथलाई आज बुंगमति लगिँदै
रातो मछिन्द्रनाथको रथलाई आज सोमबार बुंगमति लगिने ज्यापु समाजका वरिष्ठ उपाध्यक्षले जनाएका छन् ।
ज्यापु समाजको समन्वयमा बुंगमतिबाट आएका पूजारीहरुको साथमा मछिन्द्रनाथलाई बुंगमति लैजान लागिएको ज्यापु समाजका वरिष्ठ उपाध्यक्ष सन्तमान महर्जनले जानकारी दिए।
रातो मछिन्द्रनाथलाई पूजा गर्ने साइत १० : ०५ मा निश्किएको र लिन भने दिउँसो आउन लागिएको रातो मछिन्द्रनाथ पूजारी संघका अध्यक्ष यज्ञरत्न शाक्यले जानकारी दिए ।
‘बिहानको साइतमा रथमा भएका पूजारीले पूजा गर्छन् र लिन जानलाई हामी २ बजे पुग्छौ होला।’ शाक्यले भने, ‘हाम्रो ललितपुर महानगरपालिका वडा नम्बर २ ले १५० स्वयंमसेवकलाई परिचालन गरेर घेरमा राखेर ल्याउने व्यवस्था मिलाएको छ।’
महर्जनका अनुसार रातो मछिन्द्रनाथलाई लैजानको लागि २०० जना स्वंमसेवक सहभागी हुने छन् । मानिसको भेलाको लागि जिल्ला प्रशासन कार्यलयसँग अनुमति लिने प्रक्रिया भईरहेको महर्जनले जानकारी दिए।
शाक्यका अनुसार देवता बोक्ने ८ जनाले ४ दिन अगाडिबाट एक छाक खाएर बसेका हुन्छन्। उनीहरुको खानको समय मिलाउनु पर्ने भएकोले पनि १० बजे नै मछिन्द्रनाथलाई लिन जान सकिएन। शाक्यका अनुसार मंगलबजारबाट नाङ्गो खुट्टाले हिँडेर भगवानलाई ल्याउँदा लगभग ३ बज्न सक्छ।
वर्ष र सहकालका देवता रातो मछिन्द्रनाथ जात्रा लामो समयसम्म संभव नभएपछि स्थानीयले आफैले रथ तानेका थिए। यही रथ तान्नेक्रममा प्रहरीसँग स्थानीयको झडप हुदाँ दुबै पक्षको व्व्यति घाइते भएका थिए ।
