सीमा क्षेत्रमा तनाव कम गर्न भारत र चीनबीच ५ बुँदे सहमति
पछिल्लो समयमा सीमाको विषयलाई लिएर भारत र चीनबीच तनाब सृजना भइरहेको अवस्थामा उक्त सीमा क्षेत्रको तनाव कम गर्न भारत र चीनबीच पाँच बुँदे सहमति भएको छ ।
भारतीय विदेश मन्त्री एस जयशंकर र चिनियाँ विदेश मन्त्री वांग यीबीच रुसको मस्कोमा भएको भेटवार्तामा पाँच बुँदे सहमति भएको खबरमा उल्लेख छ ।
लद्दाखको भारत-चीन वास्तविक नियन्त्रण रेखा (एलएसी) मा भइरहेको तनाव कम गर्न पाँच बुँदे सहमति भएको बीबीसीले जनाएको छ ।
बैठकमा भारतका विदेश मन्त्री जयशंकरले एलएसीमा जारी तनाव थप बढाउने पक्षमा भारत नरहेको र चीनसँगको भारत नीतिमा पनि कुनै परिवर्तन नरहेको बताएको बीबीसीले जनाएको छ ।
बैठकमा भएका सहमतिहरु भने सार्वजनिक गरेका छैनन् । चिनियाँ विदेश मन्त्रालयले पनि दुई देश छिमेकी भएको नाताले केही मुद्दामा असहमति हुनु स्वभाविक रहेको तर त्यसलाई सही ढंगले समाधान गरिनुपर्ने पक्षमा चीन रहेको बताएको छ ।
सीमा क्षेत्रमा गोली नचलाउने सहमति भए पनि गएको हप्ता सीमा क्षेत्रमा गोली समेत चलेको खबरहरु सार्वजनिक भएका थिए ।
