निषेधाज्ञाका बिच रेलमार्ग ठेक्कामा अनियमितता भएको भन्दै माइतीघरमा प्रदर्शन
नेपाली कांग्रेसका युवा नेताहरुले काकडभिट्टा–इनरुवा रेलमार्ग ठेक्कामा अनियमितता भएको दाबी गर्दै माइतीघर मण्डलामा प्रदर्शन गरेका छन् ।
उनीहरुले पूर्वतयारी बिना जग्गा मुआब्जाको व्यवस्थासमेत नगरेर सरकारले निर्माण व्यवसायीहरुसँगको मिलेमतोमा सीमित कम्पनीहरुले मात्र प्रतिस्पर्धा गराएर ठेक्का दिएको विरोधमा कालोपट्टीसहित विरोध प्रदर्शन गरेका हुन् ।
सरकारले हचुवाका भरमा निर्माण व्यवसायीहरुसँगको मिलेमतोमा सीमित कम्पनीहरुले मात्र प्रतिस्पर्धा गर्ने मापदण्ड बनाएर ३३ अर्बको ठेक्कामा भागभण्डा गरी चरम संस्थागत र नीतिगत भ्रष्टाचार गरेकाले आफूहरु विरोध प्रदर्शनमा उत्रिएको युवा नेता रञ्जित कर्णले बताए ।
संविधानसभा सदस्य कर्णको नेतृत्वमा सुवाष पोख्रेल, डिल्लीराम सुवेदी, बनिता अधिकारी, शिव रिमाल, डम्वर सुनार, श्रीषी कोइराला, झल विक, बिष्णु खड्का, ई.भुवन भट्टलगायतका युवाहरु प्रदर्शनमा उपस्थित थिए ।
