आज देशभर कोरोनाबाट ११ जनाको ज्यान गयो, मृतक संख्या १७५ पुग्यो
नेपालमा पछिल्लो समयमा कोरोना संक्रमणबाट ज्यान गुमाउनेको संख्या दिनप्रतिदिन बढीरहेको अवस्थामा आज एकै दिन ११ जनाको मृत्यु पुष्टि भएको छ ।
आज दुई महिला र नौं पुरुषको मृत्यु भएको स्वास्थ्य मन्त्रालयका प्रवक्ता डा.जागेश्वर गौतमले बताएका छन् । योसँगै कुल मृत्यु हुनेको संख्या १ सय ७५ पुगेको छ ।
यो अहिलेसम्म एकै दिन दोस्रोपटक थपिएको सर्वाधिक मृतक संख्या हो । भदौमै यसअघि ११ जना मृतक संख्या थपिएका थिए ।
मृतकहरुमध्ये महोत्तरीमा सबैभन्दा बढी तीनजना छन् । मोरङ र भक्तपुरमा महिला एक एकजनाको मृत्यु भएको छ । मृतकहरुमा कैलाली र बाराका दुई दुई पुरुष, बाँके र काठमाडौंका एक एक पुरुष छन् ।
हालसम्म कोरोना संक्रमणबाट मृत्यु हुनेमध्ये एक सय ३५ पुरुष र ४० महिला छन् । कुल मृतकमध्ये तीनजना विदेशी छन् ।
