जुनसुकै अस्पताललाई जतिसुकैबेला कोरोना अस्पताल बनाउन सकिने संघीय सरकाको निर्णय
संघीय सरकारले आवश्यकता अनुसार जुनसुकै अस्पताललाई पनि कोरोना संक्रमितको मात्रै उपचार हुने अस्पताल बनाउने भएको छ ।
मन्त्रिपरिषद्को बिहीबारको बैठकले निजी, सहकरी, सरकारी, सामुदायिक जुनसुकै प्रकारका अस्पताललाई पनि कोरोना डेडिकेटेड बनाउन सक्ने निर्णय लिएको हो ।
मन्त्रिपरिषद्का निर्णय सार्वजनिक गर्ने क्रममा सरकारका प्रवक्ता अर्थ एवं संचार तथा सूचना प्रविधिमन्त्री युवराज खतिवडाले सरकारले त्यस्तो निर्णय लिएको जानकारी दिएका हुन् ।
सरकारले आवश्यकताअनुसार सामुदायिक, निजी अस्पताल र स्वास्थ्य प्रतिष्ठानलाई समेत प्रयोगमा ल्याई हाललाई कम्तीमा ६ हजार बेडको प्रबन्ध गर्ने र आवश्यकता अनुसार थप व्यवस्था गर्दै जाने निर्णय लिएको उनले बताए ।
त्यस्तो गर्दा कसैले विरोध गरेमा कानुनअनुसार कारबाही हुने उनको भनाइ थियो । पछिल्लो समय निजी अस्पतालका संचालकले कोरोना संक्रमणको उपचार गर्न अस्पताल प्रयोग गर्न नदिने र बाधा पार्ने भन्दै प्रतिक्रिया आएकोप्रति लक्षित गर्दै कारबाहीको निर्णय लिनुका पछाडि सोही कारण रहेको मन्त्री खतिवडाको संकेत थियो ।
त्यस्तै, उपत्यकाबाहेकका क्षेत्रमा प्रदेश मुख्यमन्त्री तथा मन्त्रिपरिषद्को कार्यालयले संक्रमण जोखिमको विश्लेषणको आधारमा आइसोलेसन बेडको प्रबन्ध गर्ने मन्त्रिपरिषद्ले निर्णय गरेको छ ।
त्यसका लागि प्रदेश कोभिड- १९ संकट व्यवस्थापन केन्द्र र जिल्ला कोभिड- १९ संकट व्यवस्थापन केन्द्रले आवश्यक समन्वय गर्ने, आइसोलेसन व्यवस्थापन र सञ्चालनका लागि आवश्यक बजेट प्रदेश कोरोना रोकथाम तथा नियन्त्रण उपचार कोषबाट उपलब्ध गराउने, आइसोलेसनको सुरक्षा प्रबन्ध नेपाली सेनाले गर्ने निर्णय मन्त्रिपरिषद्ले गरेको छ ।
