अन्तराष्ट्रिय उडानको लागि १२ वटा वायुसेवा कम्पनीले मागे अनुमति
अहिलेको बर्तमान समयमा कोरोना माहामारी नेपालमा पनि फैलिरहेको अवस्थाको बीचमा पनि सरकारले १ भदौबाट अन्तराष्ट्रिय वायुसेवा कम्पनीलाई व्यवसायिक उडानको अनुमति दिने घोषणा गरेको छ ।
नेपाल नागरिक उड्डयन प्राधिकरणका उपमहानिर्देशक राजकुमार क्षेत्रीका अनुसार सोमबारसम्म १२ वटा कम्पनीले काठमाडौंलाई विभिन्न मुलुकका १८ शहरमा जोड्ने गरी उडान अनुमति मागेका छन् ।
सरकारको घोषणा अनुसार सोमबारसम्म १२ वटा वायुसेवा कम्पनी तत्काल उडानका तयारी तयार देखिएका छन् ।
यसमा स्वदेशी दुई कम्पनी नेपाल एयरलाइन्स र हिमालय एयरलाइन्ससमेत रहेका छन् । यसबाट कुन कम्पनीलाई कुन गन्तब्यमा कतिसम्म उडान अनुमति दिने भन्ने निर्णय भने भइसकेको छैन ।
अर्कोतर्फ सरकारले पहिलो चरणमा कुन कुन मुलुकबाट जहाज चढेर नेपाल आउन पाउने भन्ने समेत स्पष्ट नपारेका कारण प्राधिकरणले उडानको अनुमति भने दिइसकेको छैन । ‘यो कम्पनीहरुबाट आएको प्रस्ताव हो,’ उनले भने, ‘हामीले दिने अनुमति छलफलकै क्रममा छ ।’
प्राधिकरणका अनुसार १ भदौमा शुरु हुने उडानमा साविकको तुलनामा कम्तिमा २५ प्रतिशत मात्र उडानलाई अनुमति दिइनेछ । अहिले आएको माग अनुसार दैनिक झण्डै २३ उडानको माग छ ।
सोमबारसम्म कम्पनीहरुले साताको कुल १ सय ५८ वटा उडानका लागि प्राधिकरणसँग अनुमति मागेका छन् । यसमध्ये सबैभन्दा धेरै नेपाल एयरलाइन्सले ५७ वटा उडानका लागि अनुमति माग गरेको छ ।
दोस्रो स्थानमा एयर अरेबियाले सातामा ३५ उडानका लागि अनुमति मागेको प्राधिकरणको तथ्यांकमा उल्लेख छ । हिमालय एयरलाइन्सले सातामा २१ उडानका लागि अनुमति मागेको छ ।
साविकमा त्रिभुवन विमानस्थलमा दैनिक औसतः ४ सय वटासम्म राष्टिय(अन्तराष्ट्रिय उडान-अवतरण हुने गथ्यो । त्यसमध्ये ९० वटासम्म अन्तराष्ट्रिय उडान-अवतरण हुने गरेको छ ।
तर, अहिले टर्मिनलमा भिडभाड नहोस भनेर केवल २५ प्रतिशत मात्र उडानलाई अनुमति दिइने उपमहानिर्देशक क्षेत्रीले जानकारी दिए ।
अन्तर्राष्ट्रियतर्फ एउटा जहाजका यात्रु टर्मिनलबाट बाहिर निस्किएपछि अर्को जहाजलाई अवतरणको अनुमति दिने गरी अनुमति दिइनेछ । प्रस्थानमा समेत सोही अनुसार व्यवस्थापन मिलाइने भएको छ ।
