मेलम्ची पहिरो अपडेट : दुईको शव फेला, ६जनाको खोजी हुँदै
बागमति प्रदेश स्थित सिन्धुपाल्चोकको मेलम्ची-११ गैराबजारमा पहिरोमा पुरिएर बेपत्ता भएका ८ जनामध्ये दुईजनाको शव फेला परेको प्रहरीले जनाएको छ ।
डिएसपी माधवप्रसाद काफ्लेका अनुसार वीरगञ्जका प्रदीप चोरसिया र राजेश चौधरीको शव निकालिएको हो । अरु दुईजनाको शव देखिए पनि निकाल्न सकिएको छैन ।
एकजनाको जीवितै उद्धार भएको छ । घाइते अवस्थामा उद्धार गरिएका व्यक्ति ३५ वर्षका भारतीय नागरिक बारु साह हुन् र उनको प्राथमिक स्वास्थ्य केन्द्र मेलम्चीमा उपचार भइरहेको डिएसपी काफ्लेले जनाकारी दिए ।
कवर्ड हल निर्माणका लागि खटिएका ९ मजदुर बसेको टिनका टहरा सोमबार बिहान साढे तीन बजेतिर माथिबाट खसेको पहिरोले पुरिएको हो । स्थानीय बासिन्दा, नेपाली सेना, नेपाल प्रहरी र सशस्त्र प्रहरी उद्धारका लागि खटिएका छन् ।
निर्माणाधीन कवर्डहल नजिकै जस्ताको टहरामा बस्दै आएका मजदुरमध्ये दुईजना भारतीय नागरिक र अरु सातजना वीरगञ्जका बासिन्दा रहेको खुलेको डिएसपी काफ्लेले बताएका छन् ।
