पूर्वडीआईजी रञ्जन कोइरालाको मुद्दामा आज सुनुवाइ हुँदै
सशस्त्र प्रहरीका पूर्वडीआईजी रञ्जन कोइरालाको कैद सजाय घटाउने फैसलाविरुद्ध परेको पुनरावलोकन निवेदनमा आज (आइतबार) सुनुवाइ हुँदैछ ।
न्यायाधीशत्रय वमकुमार श्रेष्ठ, प्रकाश कुमार ढुंगाना र कुमार रेग्मीको इजलासले मुद्दामा सुनुवाइ गर्दैछ ।
इजलासले उक्त मुद्दामा पुनरावलोकन गर्नु पर्ने ठहर गरेमा मुद्दा पूर्ण इजलासमा जानेछ भने पुनरावलोकन नगर्ने फैसला भएमा मुद्दा अघि बढ्ने छैन।
पुनरावेदन अदालतबाट पत्नी हत्यामा दोषी ठहर भइ जन्मकैदको सजाय पाएका कोइरालाको कैद सजाय सर्वोच्च अदालतले ११ वर्ष घटाइदिएको थियो ।
प्रधानन्यायाधीश चोलेन्द्रशमशेर राणा र न्यायाधीश तेजबहादुर केसीको संयुक्त इजलासले कोइरालालाई आठ वर्ष ६ महिनामात्रै कैद सजाय हुने फैसला सुनाएपछि कोइराला गएको बिहीबार रिहा भइसकेका छन्।
उक्त फैसला गलत भएको दाबीसहित पुनरावलोकनको माग गर्दै महान्यायाधीवक्ताको कार्यालयले बिहीबार सर्वोच्चमा मुद्दा दर्ता गराएको थियो ।
पत्नी गीता ढकालको हत्या गरेको कसुरमा काठमाडौं जिल्ला अदालत र तत्कालीन ललितपुर पुनरावेदन अदालत (अहिले उच्च) ले कोइरालालाई सर्वस्वसहित जन्मकैद सजाय तोकेको थियो ।
