ल्यापटपको माग ह्वात्तै बढ्यो, १० देखि १५ हजार मूल्य बढाएर विक्रेताले बेचे
लकडाउनका कारण बजारमा ल्यापटपको माग बढे ह्वात्तै बढेको छ । धेरैले अफिसको काम घरबाटै गर्दा माग बढेको हो । माग बढेसँगै व्यवसायीहरुले एउटा ल्यापटपको मूल्य १० देखि १५ हजार रुपैयाँसम्म बढाएर बेचेको छन ।
विक्रेताहरुका अनुसार डेल, एसर, आसुस, लेनोभो, एप्पल, एचपी लगायतका नेपालमा बिक्री हुने सबैजसो ब्रान्डका ल्यापटपको मूल्य बढेर आएकाले महँगोमा बेच्नुपरेको हो ।
लकडाउनका कारण माग र आपूर्तिबीच सन्तुलन नमिल्दा मूल्य बढेको उनीहरुको भनाइ छ । ल्यापटप विक्रेता रामेश्वर नेपालका अनुसार लकडाउनले ल्यापटपको व्यापारमा खासै असर गरेन बरु उल्टै फाइदा भयो । तर, लकडाउनका कारण आयातमा केही कठिनाइ भने विक्रेताले झेल्नुपरेको उनी बताउछन ।
लकडाउनका कारण अफिसको काम घरमै गर्नेको संख्या बढेको छ । यसबाहेक अनलाइन कक्षा, अनलाइन मार्केटिङ लगायतका अनलाइनको काम बढ्न थालेपछि ल्यापटपको माग बढेको छ ।
तर अन्तर्राष्ट्रिय उडान ठप्प हुँदा विमान चार्टर्ड गरेर सामान ल्याउनुपर्दा बढी रकम लाग्ने हुँदा मूल्य बढेको विक्रेताहरुको भनाइ छ ।
