डब्लुएचओले दियो कोरोना महामारीको अझै खराब अवस्था आउन सक्ने चेतावनी
विश्व स्वास्थ्य संगठनले कोरोना महामारीको अझै खराब अवस्था आउन सक्ने चेतावनी दिएको छ ।
डब्लुएचओका महानिर्देशक डाक्टर टेडरोज आध्यनोम गेब्रेयेसोसले विश्वका सरकारहरुले नियन्त्रणका लागि सही नीति अवलम्बन गर्न नसकेमा भाइरसबाट अझै धेरै मानिस सङ्क्रमित हुन सक्ने बताएका हुन् ।
उनले अझै पनि परीक्षण, ट्रेसिङ्ग, आइसोलेशन र क्वरेण्टीन नै महामारी नियन्त्रणमा लिने प्रमुख उपाय भएको बताएका छन् ।
महामारीको छिट्टै नै अन्त्य होस् भन्ने चाहे पनि छिट्टै अन्त्य हुने अवस्थामा नरहेको उनको भनाई छ ।
केही देशले महामारी नियन्त्रणका लागि प्रगति गरे पनि विश्वब्यापी महामारीले भने गति बढाइरहेको बेला विश्वभरका देशलाई जर्मनी, दक्षिण कोरिया र जापानको उदाहरण हेर्न उनले आग्रहसमेत गरेका छन् ।
ती देशले महामारी लगभग नियन्त्रणमा लिएका छन् । ६ महिनाको अवधिमा विश्वभर सङ्क्रमितको संख्या एक करोड दुई लाख ६८ हजारभन्दा धेरै पुगेको छ भने ज्यान गुमाउनेको संख्या पाँच लाख चार हजारभन्दा धेरै छ ।
कोरोना भाइरसबाट अमेरिका सबैभन्दा धेरै प्रभावित छ ।
