ललितपुरको तीनपाने भञ्ज्याङमा तरकारी सङ्कलन केन्द्र निर्माण गरिने
काठमाण्डौ : दक्षिण ललितपुरको वाग्मती गाउँपालिकाले आर्थिक वर्ष २०७७/७८ मा वाग्मती प्रवेश गर्ने नाका तीनपाने भञ्ज्याङमा तरकारी सङ्कलन केन्द्र निर्माण गर्ने भएको छ ।
गाउँपालिकाका अध्यक्ष वीरबहादुर लोप्चनले आउँदो आर्थिक वर्षको नीति तथा कार्यक्रम मङ्गलबार प्रस्तुत गर्दै उक्त कुराको जानकारी गराएका छन् ।
गाउँपालिकाले अस्पताल निर्माण, वैदेशिक रोजगारीबाट फर्केर आउने युवाले व्यवसाय गर्न चाहेमा ब्याजमा अनुदानलगायतका कार्यक्रमलाई प्राथमिकता दिएको जनाइएको छ ।
गाउँसभामा उपाध्यक्ष रञ्जना घिमिरेले ४२ करोड ५६ लाखको बजेट प्रस्तुत गरे । कार्यक्रममा गाउँपालिकाले वित्तीय समानीकरणतर्फ सङ्घीय सरकारबाट ७ करोड ३३ लाख र प्रदेश सरकारबाट ५८ लाख ९४ हजार, सशर्त अनुदानतर्फ सङ्घीय सरकारबाट १९ करोड ५२ लाख, प्रदेश सरकारबाट २ करोड ३२ लाख ७५ हजार बजेट विनियोजन गरेको जानकारी दिए ।
यसैगरी सङ्घीय सरकारको राजश्व बाडफाँटबाट ५ करोड १३ लाख, प्रदेश सरकारको राजश्व बाडफाँडबाट एक करोड ५८ लाख ३४ हजार, गाउँपालिकाको आन्तरिक आयबाट रु पाँच करोड ६३ लाख र रजिष्टे«शन दस्तुरबाट ५० लाख आम्दानी हुने गाउँपालिकाको अनुमान छ
