५२ जिल्लामा कोरोना परीक्षण, पीसीआर परीक्षण पछि मात्रै कोरोना भए वा नभएको पुष्टि हुने
बर्तमान समयमा हाम्रो नेपाली समुदायमा कोरोनाको संक्रमित बढी रहेको अवस्थामा ५२ जिल्लामा नेपाल सरकारले कोरोना भाइरसको परीक्षण सुरु गरेको छ ।
स्वास्थ्य तथा जनसङ्ख्या मन्त्रालयका प्रवक्ता डाक्टर विकास देवकोटाले रियल टाइम पोलिमरेज चेन्ज रियाक्सन (पीसीआर) र र्यापिड डायग्नोस्टिक टेस्ट (आरडीटी) गरी दुवै विधिबाट ५२ जिल्लामा परीक्षण गरिएको जानकारी दिएका छन् ।
अहिले पीसीआरबाट देशभरिमा ११ ठाउँमा परीक्षण भइरहेको छ । बाँकी २५ जिल्लामा पनि चाँडै नै परीक्षण गरिने उनले बताए । उनका अनुसार अहिले ती दुवै विधिबाट १० हजार ९ सय ८२ जनाको परीक्षण गरिएको छ ।
कोरोना भाइरसको सङ्क्रमण भए वा नभएकोबारे पीसीआर विधिमार्फत गरिने परीक्षण नै निर्णायक हुनेछ । कतिपय अवस्थामा र्यापिड टेस्ट किटमा नेगेटिभ देखिए पीसीआर विधिमा पोजेटिभ देखिन्छ अनि र्यापिड टेस्टमा पोजेटिभ देखिए पीसीआरमा नेगेटिभ देखिने सम्भावना पनि रहन्छ ।
तर यो टेस्टमा पोजेटिभ आउँदैमा कोरोना भाइरस भएको पुष्टि हुँदैन । पीसीआरपछि मात्र थाहा हुने स्वास्थ्य मन्त्रालयले जनाएको छ ।
मन्त्रालयका प्रवक्ता डाक्टर विकास देवकोटाका अनुसार र्यापिड टेस्ट किटमार्फत भएको परीक्षणको नतिजालाई नै अन्तिम मान्न सकिँदैन ।
शुक्रराज ट्रपिकल तथा सरुवा रोग अस्पताल टेकुका प्रवक्ता डाक्टर अनुप बाँस्तोलाले पनि र्यापिड टेस्ट किटमार्फत आएको नतिजालाई निश्चित गर्न पीसीआर विधिमार्फत अनिवार्य परीक्षण गर्नुपर्ने बताए ।
सोमबार राष्ट्रिय जनस्वास्थ्य प्रयोगशालामा परीक्षणका क्रममा कैलालीको लम्की नगरपालिकामा ६५ वर्षीया महिला र रौतहतमा १९ वर्षीय पुरुषमा कोभिड १९ को सङ्क्रमण देखिएको छ ।
दुवै सङ्क्रमितको अनुसन्धान र (कन्ट्याक ट्रेसिङ) गर्ने कार्य सुरु भइसकेको मन्त्रालयका प्रवक्ता देवकोटाले जानकारी दिए ।
यसैबीच कोरोनाको द्रूत परीक्षण अर्थात् आरडिटीमा पोजेटिभ आएको बाग्लुङ जिल्लाको काठेखोला गाउँपालिकाका एक ६५ वर्षीया वृद्धाको स्वाब परीक्षण रिपोर्ट भने नेगेटिभ आएको छ ।
काठमाण्डौ पेप्सिकोलाको सनसिटी अपार्टमेन्टमा बसोबास गरिरहेका तीन जनामा आरडिटी गर्दा कोरोना भाइरसको आशङ्का भएपछि उनीहरुलाई पाटन अस्पतालको आइसोलेशनमा भर्ना गरिएको छ ।
