प्रदेश १ को राजधानी विराटनगर समेत आसपासका शहरहरु सुनसान, ग्यासको जोहोमा उपभोक्ताहरु भौतारिँदै
लकडाउनका कारण प्रदेश १ को राजधानी विराटनगरसहित आसपासका जिल्लाका शहरहरु सुनसान छन् । विश्वमा महामारीका रूपमा फैलिएको कोरोना भाइरस (कोभिड-१९)बाट सतर्क रहन सरकारले गरेको आग्रहलाई पालना गर्दै प्रायः मानिसहरु घरबाहिर निस्किएका छैनन् ।
त्यसैगरी, औषधि पसलमा मानिसहरुको भिड लाग्ने गरेको छ । ग्यासको जोहोमा पनि मानिसहरु लागेका देखिन्छन् । विराटनगरमा लकडाउनको छैठौं दिनसम्म आइपुग्दा उपभोक्ताहरु ग्यासको जोहोका लागि भौतारिन बाध्य छन् ।
तुलनात्मक रुपले अहिले नागरिकले लकडाउनलाई कार्यान्वयन गरेकको पाइएको छ । बेलुकाको समयमा मात्रै विराटनगरमा तरकारी, खाद्यान्न किनमेलका लागि मानिसहरु बजारमा निस्कने गरेको पाइन्छ ।
आधा सिलिण्डर ग्यासका लागि कुनै कम्पनीको ग्यास सहज पाएपनि कुनै कम्पनीको ग्यास बजारमा अभाव छ । एक कम्पनीको ग्यास अर्को कम्पनीले नसाट्दा उपभोक्ता मारमा छन् ।
विराटनगर मुनाल पथकी प्रियंका सिंह ग्यास खोजीमा निस्किएको तीनदिन भएपनि आफूले ग्यास पाउन नसकेको गुनासो गरिन् ।
कोशी लगायतका ग्यास कम्पनीका डिलर खुल्ला रहेपनि रिजाल ग्यासको डिलर सबै बन्द रहेको उपभोक्ताहरु बताउँछन् ।
स्थानीय भन्छन्– ग्यासका डिलरवालाले मोबाइलसमेत स्वीचअफ गरेर बसेका छन् । आफ्नो डिलरमा ग्यास मौज्दात रहेपनि अन्य ग्यास कम्पनीको सिलिण्डर साट्न नमिल्ने दिनेश महतोले बताए ।
त्यसैगरी, औषधि पसलमा भने फाटफुट मानिस औषधि लिन आउने गरेका छन् । अति आवश्यक औषधि लिन मानिसहरु पसलमा आउने गरेको मेडिकल सञ्चालकहरु बताउँछन् ।
विराटनगरमा प्रेस, एम्बुलेन्स, खानेपानी, दुध, अस्पतालका सवारी साधन, प्रहरी, शवबाहन मात्र सडकमा गुडेका छन् । भित्री सडकमा भने केही फाट्फुट्ट मोटरसाइकल चलेका र साना किराना, चिया पसल खुलेका छन् ।
प्रहरीले चोक-चोकमा चेकजाँचलाई कडाई गरेको छ भने सडकमा देखिएका मानिसहरूलाई घरभित्रै बस्न आह्वान गरिरहेको जिल्ला प्रहरी कार्यालयका प्रहरी उपरीक्षक विश्व अधिकारीले बताए ।
दिनभर यसको पूर्णरुपमा पालना गरिएको छ । तर, बेलुका भने केहीबेर बजार अस्तव्यस्त देखिने गरेको छ ।
