१० गतेदेखि सबै यातायात बन्द, लाखौंको संख्यामा राजधानी छाड्ने यात्रुको चाप
चैत १० गतेदेखि लामो दुरीको सबै यातायात बन्द हुने भएपछि लाखौंको संख्यामा राजधानी छाड्ने यात्रुको चाप बढेको छ ।
सरकारले १० चैत्रबाट लागू हुने गरी दुई हप्ता लामो दुरीको यातायात सेवा बन्द घोषणा गरेपछि काठमाडौं उपत्यका छाड्ने चाप बढेको हो ।
एकै दिन दुई लाखभन्दा बढी मानिसले काठमाडौं उपत्यका छाड्ने क्रम चलेको यातयात व्यवसायीले जनाएका छन् ।
यात्रुको चाप बढेपछि यातायात व्यवसायीले बस सेवा थप्दैछन् । आजै दुई सय भन्दा बढी बस सेवा थप्न लागिएको यातायात व्यवसायी महासंघका महासचिव सरोज सिटौलाले जानकारी दिए ।
अहिले नयाँ बसपार्क, कोटेश्वर र पुरानो बसपार्कमा भीड बढेको छ । यात्रुहरु टिकट नपाएर समस्यामा परेका छन् । चाप बढेपछि सरकारी बस समेत सञ्चालन गर्ने तयारी भएको बुझिएको छ ।
कोरोना भाइरसको जोखिमबाट बच्न सरकारले अत्यावश्यक बाहेकका सेवा बन्दको घोषणा गरिसकेको छ ।
शैक्षिक संघसंस्था ६ चैत्रबाट नै बन्द छन् । एसईई स्थगित भएको छ भने विश्वविद्यालय र सरकारी सेवा प्रवेशका परीक्षाहरु पनि स्थगित गरिएका छन् ।
वैशाखयता जनजीवन सामान्य नहुने देखिपछि मानिसहरु काठमाडौं छाडेर घर गएका हुन् ।
अहिले सडकमा आवागमन पातलिदै गएको छ । राजधानीबाट आउने जाने मुख्य नाकाहरुमा भने चाप बढेको छ ।
