स्वरका धनि गायक शिशिर योगीको ६० लाख लिएर एक महिला फरार
स्वरका धनि गायक शिशिर योगीको ६० लाख लिएर एक महिला फरार भएकी छन् ।
दाङ तुल्सीपुरकी झरना कुँवर (केसी) ले २०७२–०७५ को अवधिमा गायक योगीकी पत्नी खिमी योगीबाट पटक–पटक गरी ६० लाख रुपैयाँ लिएको उजुरी प्रहरीमा दर्ता भएसँगै यसबारे खुलासा भएको हो ।
योगीको पैसा फिर्ता गर्न भन्दै कुँबरले ३०/३० लाख रुपैयाँका कृषि विकास बैंक नयाँ बानेश्वर शान्तिनगर शाखाका दुईवटा चेक खिमीका नाममा काटिदिएकी थिइन् । पुस तेस्रो साता खिमी र शिशिर चेक साट्न गएपनि बैंकले ‘झरना कुँवर (केसी) का नाममा रहेको खाता चार दिनअघि नै बन्द भइसकेको’ जानकारी दिएपछि योगी दम्पती छाँगाबाट खसेजस्तै भएका थिए ।
योगीका अनुसार महानगरीय प्रहरी परिसर टेकुको मुद्दा शाखाले पक्राउ गरेर पैसा फिर्ता ल्याइदिने बचन दिएपनि २ महीना अघि नै प्रहरीमा उजुरी गरिएपनि प्रहरीले कुँवरलाई पक्रन सकिरहेको छैन ।
सोही कारण पछिल्लो समय गायक योगी आफूलाई ठगेकी महिलालाई पक्राउ गर्न दबाब दिन टेकुमा हप्तैपिच्छे जसो जानेगरेका छन् । प्रहरीले कुँबरलाई खोजिको सुचीमा राखेको भएपनि भेट्न सकेको छैन ।
