पृथ्वीनारायणको दृष्टिकोण गणतन्त्रमा पनि सान्दर्भिक, राष्ट्रपति भण्डारीद्वारा प्रशंसा
काठमाडौं : पृथ्वी जयन्तीको अवसरमा राष्ट्रपति विद्यादेवी भण्डारीले पृथ्वीनारायण शाहका दृष्टिकोणहरु संघीय लोकतान्त्रिक गणतन्त्रमा पनि सान्दर्भिक भएको बताएकी छन् ।
राष्ट्रपति भण्डारीले पृथ्वी जयन्तीको अवसरमा आइतबार शुभकामना सन्देश दिँदै सभ्यता, संस्कृति र सम्पदालाई पृथ्वीनारायण शाहले सम्मान गरेको भन्दै प्रशंसा गरेकी हुन् ।
‘नेपाली समाज सांस्कृतिक विविधताबीच समन्वयको बलियो सूत्रमा एकताबद्ध भएको कुरा आत्मसात गर्दै यहाँको अमूल्य सभ्यता, संस्कृति र सम्पदालाई पृथ्वीनारायण शाहले सम्मान गर्नुभएको थियो,’ शुभकामना सन्देशमा लेखिएको छ, ‘नेपाल सबै जातको साझा फूलबारी भएको कुरा स्वीकार गर्दै जनताबीच भावनात्मक एकीकरण गर्नुपर्ने कुरामा उहाँ सजग हुनुहुन्थ्यो भन्ने कुरा उहाँका सन्देश र व्यवहारबाट स्पष्ट हुन्छ ।’
