भारतीय नम्बर प्लेटको कारमा १० किलो गाँजासहित दुई जना पक्राउ
मकवानपुर प्रहरीले गाँजा तस्करीमा प्रयोग गरिएको भारतीय नम्बरको कारसहित दुईजनालाई पक्राउ गरेको छ ।
बी.आर-०१ सी.एम-६२४२ नम्बरको भारतीय नम्बर प्लेटको कारमा सवार उनीहरूलाई हेटौंडा उपमहानगरपालिका-१९ नेवारपानीबाट नियन्त्रणमा लिएको जिल्ला प्रहरी कार्यालय मकवानपुरले जनाएको छ ।
उनीहरूबाट १० किलो १ सय ८० ग्राम गाँजा बरामद गरिएको छ । जिप्रका मकवानपुरका अनुसार कार चालक सर्लाही जिल्ला हरिपुर नगरपालिका-९ बस्ने २४ वर्षीय रञ्जितकुमार गुप्ता र कारमा सवार सोही ठेगानाका ३१ वर्षीय बालकृष्ण गुप्ता पक्राउ परेका छन् ।
उनीहरूबाट २ वटा पोकामा उक्त परिमाणको लागुऔषध गाँजा बरामद गरिएको प्रहरीले जनाएको छ ।
पक्राउ परेका दुवैजनामाथि थप अनुसन्धान भइरहेको जिप्रका मकवानपुरले जनाएको छ ।
लागुऔषध नियन्त्रण ऐन, २०३३ मा दोषी प्रमाणित भएमा २ वर्षदेखि १० वर्षसम्म कैद र १५ हजारदेखि १ लाख रुपैयाँसम्म जरिवाना तथा सवारीसाधनसमेत जफत हुनसक्ने उल्लेख छ ।
