नेपाल भारत सम्बन्धका जानकार डिपि त्रिपाठीको निधन, निधि दिल्ली जादै
भारतको राष्ट्रवादी कंग्रेस पार्टीका महासचिव, पूर्व सांसद एवं नेपाल भारत सम्बन्धका जानकार देवीप्रसाद (डिपी) त्रिपाठीको बिहीबार दिल्लीमा मृत्यु भएको छ ।
लामो समयदेखि क्यान्सरका विरामी ६७ वर्षीय त्रिपाठीले २०७४ चैत दोस्रो साता राज्यसभाको अन्तिम कार्यकाल पूरा गरेका थिए । २०४६ सालको पञ्चायतविरोधी जनआन्दोलन र २०६२-६३ को जनआन्दोलनका पक्षमा त्रिपाठीले दिल्लीको राजनीतिक बृत्तमा माहौल बनाएका थिए भने काठमाडौंमै आएर सहभागी पनि भएका थिए ।
जवाहरलाल नेहरु विश्वविद्यालयको विद्यार्थी राजनीतिबाट भारतीय कम्युनिष्ट पार्टी मार्क्सवादी हुँदै राष्ट्रवादी कंग्रेसमा उनी क्रियाशिल थिए ।
त्रिपाठी नेपालमा कांग्रेस, कम्युनिष्ट, राजावादी राजनीतिक बृत्तमा परिचित छन् । उनलाई नेपाली कांग्रेसले अझ निकट मित्रका रुपमा लिने गरेको छ ।
बिहीबार कांग्रेस केन्द्रीय कार्यसमिति बैठकले त्रिपाठीको निधनप्रति शोक प्रस्ताव पारित मात्र गरेन, अन्त्येष्टिमा सरिक हुन उपसभापति विमलेन्द्र निधिलाई दिल्ली पठाउने निर्णय गरेेेकाे छ । निधि शुक्रबार यही प्रयोजनका लागि दिल्ली उड्दैछन् ।
भारतका लागि नेपाली राजदूत नीलाम्बर आचार्यले पनि नेपालका मित्र गुमेको भन्दै ट्विटरमा शोक सन्देश लेखेका छन् । आचार्य पनि त्रिपाठीको अन्त्येष्टिमा सहभागी हुनेछन् ।
नेपालमा २०७२ असोजमा संविधान जारी भएपछि भारतले नाकाबन्दी लगाएपछि चर्को विरोधमा उत्रेका थोरै भारतीय नेतामध्ये त्रिपाठी अग्रस्थानमा थिए ।
भारतको राज्यसभाका सांसद रहेका त्रिपाठीले अन्तराष्ट्रिय मामिलामा छलफल हुने सबै समिति र बैठकहरुमा नाकाबन्दी गरेकोमा मोदी सरकारको चर्को आलोचना गरेका थिए ।
