पक्राउ परेका १२२ चिनियाँलाई देश निकाला गरिदै, मुद्दा नचलाइने
संगठित रुपमा नेपालमा आपराधिक कार्यमा संलग्न चिनियाँ नागरिकमाथि अनुसन्धान गरी मुद्दा चलाउने भन्दा देशबाट बाहिर पठाउने प्रक्रिया बढाइएको छ ।
प्रहरी स्रोतका अनुसार १२२ चिनियाँलाई चीन पठाउने कानुनी प्रक्रिया मिलाइँदैछ । उनीहरुलाई पठाइँदा विवाद नहोस् भनेर सबै कानुनी प्रक्रिया पुर्याइन लागेको हो ।
चिनियाँ विमान नै लिन आउने भनिएपनि अझै आइनसक्नुमा प्रक्रिया पुर्याउन समय लागेर हो । उनीहरुलाई अदालतमा पुर्याएर म्याद थप गर्नेभन्दा जिल्ला प्रशासन कार्यालय लगेर म्याद थप गर्ने गरी अभियोग लगाइएको छ ।
अभद्र व्यवहारको अभियोग लगाइएकाले जिल्ला प्रशासन कार्यालयमा इजलाश हुने व्यवस्था छ । त्यसका लागि आइतबार जिल्ला प्रशासन कार्यालयमा चिनियाँ नागरिकहरुलाई लगेर दश दिन म्याद थप गरिएको छ ।
गत हप्ता राजधानीको विभिन्न स्थानमा छापा मार्दा एकैपटक १२२ चिनियाँ पक्राउ परेका थिए । उनीहरु संगठित अपराधमा सक्रिय रहेको तथ्य फेला परेपनि प्रहरीले अभद्र व्यवहारको अभियोग लगाएर अनुसन्धान गरिरहेको छ ।
