नेपालीका “भाञ्जा” दार्जीलिङ्गका हर्षवर्द्वन शृंगला भारतको नयाँ विदेश सचिवमा नियुक्त
भारत सरकारले हाल अमेरिकाका लागि राजदूत रहेका हर्षवर्द्वन शृंगलालाई नयाँ विदेश सचिवमा नियुक्त गरेको छ । उनी दार्जीलिङ्गका भारतीय हुन् भने प्रधानमन्त्री नरेन्द्र मोदीको अमेरिका भ्रमणका बेला सफलपुर्वक ‘हाउडी मोदी’ कार्यक्रम गरेर उनी चर्चामा आएका थिए ।
भारतका विदेश सचिव विजय गोखलेको पदावधी सकिन केहीदिन बाँकी रहेका बेला शृंगलालाई विदेश सचिव नियुक्त गरिएको हो । गोखलेको पदावधि सकिनासाथ शृंगलाले कार्यभार सम्हाल्नेछन् ।
शृंगलाले सन् २०२० को जनवरी २९ बाट भारतको ३३ औं विदेश सचिवका रुपमा काम सुरु गर्दैछन् ।
अहिले उनी अमेरिकाका लागि भारतका राजदूत छन् । उनले यसअघि बंगलादेशका लागि भारतको उच्चायुक्त र थाइल्यान्डको लागि भारतको राजदूतका रुपमा समेत काम गरिसकेका छन्
।
उनले बंगलादेशसँगको सीमा समस्या समाधानमा पनि महत्वपूर्ण भूमिका खेलेका थिए । उनी अंग्रेजी र हिन्दीका अतिरिक्त नेपाली, भियतनामी र फ्रेन्च भाषापनि बोल्ने गरेको इकोनोमिक टाइम्सले जनाएको छ ।
उनी भारतीय विदेश मन्त्रालयमा बंगलादेश, म्यानमार, श्रीलंका र माल्दिभ्स मामिलाका प्रमुखका रुपमा पनि काम गरिसकेका छन् ।
भारतको वर्तमान सरकारले छिमेक पहिलो भन्ने नीति लिँदै आएको छ । भारतीय विदेश सचिव पदीय हिसावले पनि छिमेकी मुलुकका लागि महत्वपूर्ण पद हो ।
यता उनको पारिवारिक पृष्ठभुमिलाई हेर्दा भारतीय विदेश सचिव शृंगला भने नेपालीका भाञ्जा हुन् ।
प्रदेश ३ स्थित ललितपुर मामाघर भएका शृंगला सन् १९८४ व्याचका कर्मचारी हुन् ।
उनका पिता छिरिङ्ग शृंगला दार्जीलिङ्गमा पढ्दै गर्दा त्यहाँ पढ्न गएकी ललितपुरकी नेपाली छात्रा हरिदेवी बस्नेतसँग प्रेम सम्बन्ध गाँसिएको थियो ।
उनले त्यसपछि हरिदेवीसँग नै विवाह गरेका थिए । सचिव शृंगला परिवारको जेठो छोरो हुन् ।
उनको जन्म मुम्बइमा भएको थियो भने मायो कलेजमा उनले अध्ययन गरेका थिए । उनका मावली परिवार ललितपुर स्थायी बासिन्दा हुन् ।
