नेपालका यी ४ फुटबल खेलाडीलाई साग मा पनि प्रतिबन्ध
अनुशासनको कारबाहीमा परेका नेपालका चार फुटबल खेलाडीलाई १३ औं दक्षिण एसियाली खेलकुद (साग) मा पनि प्रतिबन्ध गरिने भएको छ ।
भुटानमा कुवेतसँग विश्वकप छनोट खेल खेल्नुअघि नेपालका चार फुटबल खेलाडी अनुशासनको कारबाहीमा परेका थिए ।
अखिल नेपाल फुटबल संघ (एन्फा) ले १३ औं सागमा पनि विमल घर्तीमगर सहित चार खेलाडीलाई प्रतिबन्ध गर्न लागेको एन्फा श्रोतले बताएको छ ।
सागको तयारी टोलीमा विमल सहित यसअघि कुवेतसँगको खेलमा प्रतिबन्धको कारबामा परेका अन्जन बिष्ट, सन्तोष तामाङ र दिनेश राजवंशीलाई समावेश गरिएको छैन ।
सन्तोष भने यसअघि सागको तयारी टोलीमा थिएनन् । ‘खेलाडीले डिस्को र नाइट क्लब गएको मात्र होइन । अन्य गम्भीर अनैतिक कार्य गरेको खबर पनि आएको छ । अनुशासन समितिले छानविन गरिरहेको छ । त्यसको रिपोर्ट आएपछि थप ठूलो कारबाही हुन सक्नेछ,’ एन्फा श्रोतले भन्यो ।
यी चार खेलाडीलाई दुई बर्षसम्म प्रतिबन्ध कारबाही हुनसक्ने समेत श्रोतले बतायो । यी खेलाडी विनै भुटानमा कुवेतसँग नेपाली टोलीले राम्रो खेलेको पनि एन्फा श्रोतले जनाएको छ ।
तटस्थ भेन्यु भुटानमा भएको विश्वकप छनोटको दोस्रो खेलमा नेपाल कुवेतसँग १-० गोलले पराजित भएको थियो । यसअघि कुवेतमा खेलिएको पहिलो खेलमा भने नेपालले कुवेतसँग ७-० गोलको अप्रत्यासित हार खेपेको थियो । पछिल्लो समय नेपाली खेलाडीको अप्रत्यासित नतिजालाई लिएर पनि भित्रभित्रै अनुसन्धान भईरहेको बताइएको छ ।
