उपेन्द्र यादवको भनिएको कानून मन्त्रालयमा ढकालकै बोर्ड
यसअघि कानून, न्याय तथा संसदीय मामिला मन्त्री रहेका भानुभक्त ढकाल स्वास्थ्य मन्त्रीको रुपमा पदभार ग्रहण गरेपनि यता मन्त्रालयमा भने उनकै नामको बोर्ड लगाइएको छ ।
यसअघि स्वास्थ्यमन्त्री रहेका उपप्रधानमन्त्री उपेन्द्र यादवको मन्त्रालय परिवर्तन भई कानून भएको हो ।
तर स्वास्थ्य मन्त्रालयमा नयाँ मन्त्रकिो नामको वोर्ड लागेपनि कानूनमा भने पुरानै बोर्ड लगाइएको छ ।
यद्यपी मन्त्रालयको वेबसाइटमा भने माननीय उपप्रधानमन्त्री तथा कानून, न्याय तथा संसदीय मामिला मन्त्री श्री उपेन्द्र यादव लेखिएको छ । मन्त्रालयका एक कर्मचारीले भूलवस त्यस्तो हुन गएको बताए ।
‘त्यसो त उहाँले पदभार पनि ग्रहण गर्नुभएको छैन, तर प्रधानमन्त्री कार्यालयबाट पत्र भने आइसकेको छ, उनले नागरिक टाइक्ससँग भने ‘यो भूलवस हो नियतवस होइन’ ।
मन्त्रिपरिषद पुनर्गठनका क्रममा उपप्रधानमन्त्री उपेन्द्र यादवको जिम्मेवारी हेरफेर गर्दै स्वास्थ्य तथा जनसङ्ख्या मन्त्रालयबाट कानुन, न्याय तथा संसदीय मामला मन्त्रालयको जिम्मेवारी दिइएको छ ।
यसअघि कानुन, न्याय तथा संसदीय मामला मन्त्रालयको जिम्मेवारी सम्हाल्दै आएका भानुभक्त ढकाललाई स्वास्थ्य तथा जनसंख्या मन्त्रालयको जिम्मेवारी दिइएको छ ।
जिम्मेवारी हेरफेर हुँदा विदेश भ्रमणमा रहेका उपप्रधानमन्त्री यादवले कानुन, न्याय तथा संसदीय मामिला मन्त्रालयमा पद बहाली गर्न बाँकी छ ।
नवनियुक्त मन्त्रीहरुको बिहीबार मन्त्रालयमा धुमधामका साथ स्वागत हुँदा कानुन, न्याय तथा संसदीय मामला मन्त्रालय भने शुक्रबार पनि सुनसान छ ।
उपप्रधानमन्त्री तथा विभागीय मन्त्री उपेन्द्र यादवको कायकक्ष अगाडि उनको ‘नेमप्लेट’ समेत बनाइएको छैन भने मन्त्रीको सचिवालय कक्षसमेत सुनसान छ ।
मन्त्रीको स्वागतका लागि एक जना कार्यालय सहयोगीले यसअघि नै प्रयोग भइसकेका खादा मिलाएर राखेका छन् । कर्मचारीहरुको उपस्थितिसमेत पातलो छ ।
