पाकिस्तान रेल दुर्घटना अपडेट : मृत्यु हुनेको संख्या ७० पुग्यो
पाकिस्तानको कराची सहरबाट लाहोरतर्फ गइरहेको यात्रुवाहक रेलमा आगलागी हुँदा कम्तीमा ७० जनाको मृत्यु भएको छ ।
तेजगाम एक्सप्रेसमा लियाकतपुर भन्ने ठाउँमा भएको उक्त घटनामा ३ वटा डिब्बामा आगलागी भएको स्थानीय सञ्चारमाध्यमले जनाएका छन । स्थानीय प्रहरी अधिकारीलाई उदृत गर्दै समाचार संस्था सीएनएनले जनाए अनुसार कम्तीमा ७० जना मारिएका छन् भने अरू ३० जना घाइते भएका छन् ।
रेलमन्त्री शेख रशिद अहमदका अनुसार यात्रीहरूको साथमा खाना पकाउने सामान, सिलिन्डर तथा स्टोभ थिए । रेलमा सिलिन्डर विस्फोट भएर आगलागी भएको स्थानीय सञ्चारमाध्यमले जनाएका छन् ।
सञ्चारमाध्यममा उद्धृत गरिएका अधिकारीहरूका अनुसार जलिरहेको रेलबाट हाम फाल्न खोज्दा कतिपय मानिसको मृत्यु भएको थियो । अधिकारीहरूका अनुसार हताहत हुने मानिसको सङ्ख्या अझ बढ्न सक्नेछ ।
“दुईवटा स्टोभ पड्किए । उनीहरू खाना पकाउँदै थिए । उनीहरूको साथमा तेल पनि थियो जसले आगो झन् फैलन पुग्यो,” रेलमन्त्रीले भने । हताहत हुनेमध्ये एउटा धार्मिक कार्यक्रममा सहभागी हुन जान लागेको एउटा समूहका मानिसहरू भएको उनले बताए ।
दुर्घटनास्थल पण्जाब प्रान्तको दक्षिणस्थित रहिम यार खान नगरनजिकै रहेको छ ।
