पाकिस्तानी सेलिब्रिटी कन्दील बलोच हत्याकाण्डमा उनका भाइलाई जन्मकैद
पाकिस्तानकी सोशल मिडिया स्टार कन्दील बलोचको हत्या घटनामा अदालतले उनका भाइ मोहम्मद वसीमलाई जन्मकैदको सजाय सुनाएको छ ।
अदालतले उनका अर्का भाइ मोहम्मद आरिफलाई वान्टेडको सूचीमा राखेको छ । यस्तै मुख्य अभियुक्त मुफ्ती अब्दुल कवी समेत चार अन्य अभियुक्तलाई रिहा गर्ने आदेश दिएको छ ।
फैसला सुनाएपछि मुफ्ती अब्दुल कवीले न्यायपालिका माथि भरोसा बढेको र यसको इमान्दारीता कायम रहने विश्वास आफूले लिएको बताए ।
पाकिस्तानी सोशल मिडिया सेलिब्रिटी कन्दील बलोचको जुलाई २०१६ मा हत्या भएको थियो ।
१५ जुलाई २०१६ मा कन्दील बलोचको उनकै भाइले हत्या गरेको खुलेको थियो । मध्यराति पक्राउ परेका उनका भाइ वसीमले हत्या स्वीकारेका थिए ।
उनको भनाई थियो कि कन्दीलका कारण उनको परिवारको बेइज्जती भइरहेको थियो । तर केही समयपछि उनले आफ्नो बयान बदलेका थिए । कन्दीलको पोष्टहरुमा आउने प्रतिक्रिया भाइ वसीमलाई मन परेको थिएन ।
आफ्नो बोल्ड अवतारका कारण कन्दीलले पाकिस्तानी सोशल मिडियामा सनसनी मच्याएकी थिइन् । उनकाे भिडियो सोशल मिडियामा पोष्ट हुन थालेपछि लाखौँ प्रशंसक बनेका थिए र केही व्यक्तिहरु उनीसँग रिसाएका थिए ।
धेरै मानिसहरुले उनीमाथि इस्लामको अपमान गरेको आरोप लगाएका थिए ।
कन्दीलले हत्यापूर्व बिबिसीलाई दिएको एक अन्तर्वार्तामा आफ्नो हत्या गर्ने धम्की आउने गरेको बताएकी थिइन् ।
उनले भनेकी थिइन्, ‘ मलाई धम्की आइरहेको छ तर मेरो भनाई के हो भने मृत्युको समय निश्चित छ जब तपाईँको मृत्युको समय आउँछ तब मर्नु नै पर्छ । ’
कन्दील बलोचका आमाबुवाले अदालतसँग उनका छोराको रिहाईको याचना गरेका थिए तर अदालले त्यसलाई स्वीकार गरेन ।
