समृद्धिका लागि शान्तिसुरक्षा र राजनीतिक स्थिरता अत्यन्त जरुरी : मुख्यमन्त्री राई
विराटनगर : प्रदेश १ का मुख्यमन्त्री शेरधन राईले शान्तिसुरक्षा र राजनीतिक स्थिरताबिना देश समृद्ध हुन नसक्ने बताएका छन् । नेपाल सरकार, गृह मन्त्रालय र प्रदेश सरकार आन्तरिक मामिला तथा कानुन मन्त्रालयद्वारा संयुक्त रुपमा आयोजिक प्रदेशस्तरीय सुरक्षा गोष्ठीलाई आइतबार विराटनगरमा उद्घाटन गर्दै उनले सो कुरा बताएका हुन् ।
मुख्यमन्त्री राईले देश निर्माणको पहिलो सर्त शान्तिसुरक्षा, सुशासन र राजनीतिक स्थायित्व हो भन्दै स्वच्छ र समुन्नत प्रदेश बनाउन प्रदेश सरकारले कृषि, पर्यटन, उद्योगलाई उच्च प्राथमिकतामा राखेको बताए । उनले शान्तिसुरक्षाको स्थिति बलियो भएमा मात्र देश निर्माण गर्न सरकारले लिएको सङ्कल्प पूरा हुने विचार व्यक्त गरे ।
शनिबारदेखि चलेको बैठकको समीक्षा गर्दा प्रदेश १ मा शान्तिसुरक्षाको स्थिति सन्तोषजक रहेको पाइएको बताउँदै मुख्यमन्त्री राईले शान्तिसुरक्षाको चुनौतीलाई सामना गर्न सबै एकजुट भएर लाग्नुपर्नेमा जोड दिए । आन्तरिक मामिला तथा कानुनमन्त्री हिक्मतकुमार कार्कीले सरकार समाजवादको लक्ष्य पूरा गर्ने दिशामा अघि बढिरहेको र यसैको माध्यमबाट समृद्ध नेपाल र सुखी नेपाली बनाउन सकिनेमा जोड दिए ।
बैठकमा गृहमन्त्रीका सल्लाहकार इन्द्रजीत राई, प्रहरी महानिरीक्षक सर्वेन्द्र खनाल, सशस्त्र प्रहरी महानिरीक्षक शैलेन्द्र खनाल, प्रदेश १ का प्रहरी प्रमुख ठाकुरप्रसाद ज्ञवाली, १४ वटै जिल्लाका प्रजिअ, प्रहरी र सशस्त्र प्रहरी प्रमुखहरु सुरक्षा समितिका पदाधिकारीहरुको सहभागिता रहेको थियो ।
