आइडिया स्टुडियोको ४५ उत्कृष्टमा ‘गिफ्ट के दिऊ डटकम’ पनि छनोट
आइडिया स्टुडियोको ४५ उत्कृष्ट आइडियाहरू मध्ये ‘गिफ्ट के दिऊ डटकम’ पनि छनोट भएको छ । २५८ आइडियाहरुमध्ये जम्मा ४५ ओटा आइडियालाई इन्क्युबेसन चरणका लागि छनोट गरिएको हो ।
जसमा ‘गिफ्ट के दिऊ डटकम’लाई पनि छनोट गरिएको छ । कोशी प्रदेश स्थित सुनसरी इनरुवाका शिवनारायण पंडित यस ‘गिफ्ट के दिऊ डटकम’का संचालक हुन् ।
उनले अनलाइनको माध्यमबाट यो स्टाटपको सुरुवात गरेका थिए । केहि महिना वैदशिक रोजगारमा बिताएका शिवनारायणले नेपालमै बसेर केहि गर्न सकिन्छ भन्दै गिफ्ट के दिऊ डटकम संचालनमा ल्याएका हुन् ।
यी ४५ आइडियाहरूलाई इन्क्युबेसन चरणमा व्यवसाय विकास, वित्तीय योजना, ब्रान्डिङ, मार्केटिङ र लगानी तयारीलगायतका तालिम र मार्गदर्शन प्रदान गरिनेछ ।
त्यसपछि उत्कृष्ट ३० आइडियाहरू अन्तिम फाइनल पिचिङ चरणमा पुग्नेछन्, जहाँ उनीहरूले लगानीकर्तामाझ पिच गर्ने अवसर पाउनेछन् ।
यसले समावेशी उद्यमशीलता र रिटर्नी माइग्रेन्टहरूको भूमिकालाई मजबुत बनाएको आयोजकको भनाइ छ । गिफ्ट के दिऊ डटकमका अलावा छनोटमा परेका केही प्रमुख उद्यमहरूमा ‘आमा छोरी अचार’, ‘गोर्खा वाच’, ‘कपडा डट कम’, ‘एचआर साथी’, ‘जय दुबेराली फलफूल प्रशोधन उद्योग’ र ‘कनेक्ट किसान’ समावेश छन् ।
यसपटक छनोटमा परेका आइडियाहरू देशका विभिन्न जिल्लादेखि विदेशमा रहेका नेपालीहरूले समेत पेस गरेका थिए । २० आइडिया वैदेशिक रोजगारीबाट फर्किएका नेपालीहरूको अगुवाइमा छन् भने ५० आइडिया विपन्न तथा सीमान्तकृत समुदायबाट आएका छन् ।
आइडिया स्टुडियो नेपालुद्वारा सञ्चालित राष्ट्रिय उद्यमशीलता कार्यक्रम ‘नेसनल आइडिया हन्ट सिजन– ८’ अन्तर्गत २५८ आइडियामध्ये ८८ जनाले आफ्नो विचार प्रस्तुत गरेपछि ४५ उत्कृष्ट आइडियाहरू इन्क्युबेसन चरणका लागि छनोट गरिएको हो ।
आइडिया स्टुडियो नेपालले विगत १२ वर्षदेखि नेपाली युवाहरू, घरेलु उद्यमी र सीमान्तकृत समुदायका विचारहरूलाई व्यवसायमा रूपान्तरण गर्दै आएको छ । अहिलेसम्म १३५ भन्दा बढी स्टार्टअपहरूले यस अभियानबाट प्रत्यक्ष लाभ लिएका छन् ।
