झलनाथको आरोप: जलविद्युत योजनाको पीपीएबाट ८ अर्बको लेनदेन हुँदैछ
काठमाडौँ । पूर्वप्रधानमन्त्री झलनाथ खनालले देशव्यापी रूपमा भ्रष्टाचार बढेको बताएका छन् । आइतबार पार्टी निकट खेलकुद महासंघको कार्यक्रमलाई सम्बोधन गर्दै खनालले अहिले देशव्यापी रूपमा भ्रष्टाचार नै भ्रष्टाचार रहेको र हरेक क्षेत्रमा सरकारका वरपर भ्रष्टाचार व्याप्त भएको जिकिर गरेका हुन् ।
उनले भ्रष्टाचारको पछिल्लो उदाहरण कुलमान घिसिङलाई हटाउनु भएको बताए । उनले अहिले कम्तीमा ४ हजार मेगावाटका जलविद्युत योजनाहरूको पीपीए गर्ने बेला भएको र त्यसमा ६ देखि ८ अर्बको लेनदेन भइरहेको दाबी गरे ।
पूर्वप्रधानमन्त्री खनालले भने, ‘देशव्यापी रूपमा भ्रष्टाचार नै भ्रष्टाचार छ । हरेक क्षेत्रमा सरकारका वरिपरि भ्रष्टाचार नै भ्रष्टाचार छ । अनि मन्त्रालयमा गयो भ्रष्टाचार नै भ्रष्टाचार छ । भ्रष्टाचारमा सबैभन्दा पछिल्लो उदाहरण म भन्न चाहन्छु । कुलमान घिसिङलाई विद्युत् प्राधिकरणबाट किन फ्याँकियो ? जबकि उनको तीन महिना मात्रै बाँकी थियो ।
तीन महिना मात्रै भएको कर्मचारीलाई यति जबरजस्ती रूपले निर्ममतापूर्वक, कायरतापूर्वक र स्वार्थपूर्ण ढंगले किन फ्याँकियो । किनभने अहिले विद्युत् प्राधिकरणबाट देशभर विकास गरिने जलविद्युत आयोजनाहरू छन्, त्यसमा कम्तीमा ४ हजार मेगावाटका जलविद्युत योजनाहरूको पीपीए गर्ने बेला भएको छ । बिजुली कतिमा किन्ने भनेर मोलतोल गर्ने बेलामा हो यो । त्यो बेलामा धेरै ठुला लेनदेनका कामहरू हुने गर्दछन् । त्यसमा ६ देखि ८ अर्बको लेनदेन हुनेवाला छ ।’
