इजरायली हवाई आक्रमणमा हमासका राजनीतिक नेता र उनकी पत्नीको मृत्यु
युद्धको पृष्ठभूमि
१० चैत, काठमाडौं । इजरायली हवाई आक्रमणमा हमासका शीर्ष राजनीतिक नेता सलाह अल-बर्दावील र उनकी पत्नीको मृत्यु भएको छ । हमासले आइतबार बिहान यसबारे पुष्टि गरेको हो। यो हमला दक्षिणी गाजाको खान युनिस शहरमा भएको थियो ।
त्यसैगरी, शनिबार राति इजरायलले लेबनानका विभिन्न स्थानहरूमा हवाई आक्रमण गर्यो। यी हमलाहरूमा ७ जनाको ज्यान गएको छ । इजरायलले यो हमला लेबनानबाट प्रहार गरिएका रकेटहरूको जवाफमा गरेको बताएको छ । चार महिनादेखि हिजबुल्लाहसँग चलिरहेको युद्धविरामपछि इजरायलको यो पहिलो ठूलो हमला हो ।
हिजबुल्लाहको प्रतिक्रिया
हिजबुल्लाहले एक विज्ञप्ति जारी गर्दै इजरायलमा रकेट प्रहार नगरेको र युद्धविरामको पालन गरिरहेको बताएको छ। तर, इजरायली सेना (आईडीएफ) का अनुसार लेबनान सीमामा रहेको मेटुला सहरबाट ६ रकेट प्रहार गरिएका थिए, जसमा ३ वटा इजरायली भूमिमा प्रवेश गरेका थिए तर ती रकेटहरू हावामै नष्ट गरिएको थियो ।
आईडीएफका अनुसार आक्रमणकारीहरूको पहिचान हुन नसके पनि हिजबुल्लाहका कमाण्ड सेन्टर र दर्जनौं रकेट प्रक्षेपण स्थललाई लक्षित गरिएको छ ।
इजरायलले तोड्यो हमाससँगको युद्धविराम
गत हप्ता मंगलबार इजरायलले युद्धविराम तोड्दै गाजामा पुनः हवाई आक्रमणहरू सुरु गरेको थियो । यी आक्रमणहरूमा हालसम्म ६०० भन्दा बढी प्यालेस्टिनीको मृत्यु भइसकेको छ ।
इजरायली सेनाले गाजा सहरका तीन क्षेत्रहरूमा नयाँ आक्रमणको योजना बनाइरहेको बताएको छ र त्यहाँका नागरिकहरूलाई ती इलाकाहरू छोड्न चेतावनी दिएको छ ।
इजरायलले हमासको नियन्त्रणमा रहेका ५९ बन्धकहरूको रिहाइ नभएसम्म गाजामा आक्रमण तीव्र पार्ने आदेश दिएको छ। ती बन्दकहरूमध्ये २४ जना मात्र जीवित रहेको बताइएको छ ।
यसअघि, जनवरी १९ मा भएको युद्धविराम समझौतामा बन्दकहरूको रिहाइको सहमति बनेको थियो ।
नेतन्याहूको निर्देशन
टाइम्स अफ इजरायलका अनुसार, रकेट हमलाहरूको जवाफमा इजरायली प्रधानमन्त्री बेन्जामिन नेतन्याहूले लेबनानमा व्यापक कारबाही गर्न सेनालाई आदेश दिएका छन् । दर्जनौं स्थानहरूलाई निशाना बनाउन निर्देशन दिइएको छ ।
त्यसैगरी, लेबनानका प्रधानमन्त्री नवाफ सलामले पनि आफ्ना सेनालाई आवश्यक कदम चाल्न भनेका छन्। तर, उनले लेबनान युद्ध चाहँदैन भन्ने कुरा पनि स्पष्ट पारेका छन् ।
लेबनानको सरकारी समाचार एजेन्सी एनएनएका अनुसार, इजरायली आक्रमणमा दक्षिणी लेबनानको टूलिन गाउँमा एक बच्चासहित ५ जनाको मृत्यु भएको छ भने थप १० जना घाइते भएका छन् ।
हमासले अक्टोबर ७, २०२३ मा इजरायलमा हमला गरेपछि हिजबुल्लाहले पनि इजरायलमाथि मिसाइल, ड्रोन र रकेट हमला सुरू गरेको थियो । सेप्टेम्बरबाट सुरु भएको युद्धमा इजरायलले ठूलो मात्रामा हवाई हमला गर्दै हिजबुल्लाहका थुप्रै वरिष्ठ नेताहरूको हत्या गरेको छ ।
यो संघर्षमा लेबनानमा ४,००० भन्दा बढी नागरिकहरूको मृत्यु भयो भने लगभग ६० हजार इजरायली विस्थापित भए ।
युद्धविरामको समय सीमा र समस्या
युद्धविराम समझौताअनुसार, इजरायलले जनवरीको अन्त्यसम्ममा लेबनानका सबै इलाकाबाट फिर्ता हुनुपर्ने थियो । तर यो समय सीमा बढाएर १८ फेब्रुअरीसम्म पुर्याइएको छ । यद्यपि, इजरायल अझै पनि लेबनानका पाँच स्थानमा आफ्नो उपस्थिति कायम राखिरहेको छ ।
लेबनानले संयुक्त राष्ट्रसंघसँग इजरायललाई पूर्ण रूपमा फिर्ता गराउन दबाब दिन अपिल गरेको छ ।
संयुक्त राष्ट्रसंघको अन्तरिम सेनाले पनि सम्भावित हिंसाको बढोत्तरीप्रति चिन्ता व्यक्त गरेको छ र सबै पक्षलाई संयम अपनाउन आह्वान गरेको छ ।
