‘नो केबलकार’ समूहलाई सरकारी टोलीले फेरि वार्तामा बोलायो
विराटनगर । ताप्लेजुङको पाथीभरा क्षेत्रमा केबलकार निर्माणको विरोधमा आन्दोलन गरिरहेको समूहलाई पुन: वार्तामा आउन सरकारी टोलीले आव्हान गरेको छ ।
सरकारी वार्ता टोलीका संयोजक गृहमन्त्रालयका सहसचिव प्रेमप्रसाद भट्टराईले विज्ञप्ति निकाल्दै आन्दोलनरत् समूहलाई संवादमा आएर समाधान खोज्न आग्रह गरेका हुन् ।
सरकारले केबलकार निर्माणको क्रममा उत्पन्न समस्या र विवाद समाधान गर्न भट्टराईको संयोजकत्वमा माघ २० गते वार्ता टोली गठन गरेको थियो । ‘नो केबलकार’ समूहले पनि अमर तुम्हाङ्गको संयोजकत्वमा वार्ता समिति बताएको थियो । दुई पक्षबीच २/३ चरणमा वार्ता भएपनि समाधान निस्किएको छैन ।
आन्दोलनरत् पक्षले मन्त्रीस्तरीय टोलीसँगमात्रै वार्ता गर्ने माग राख्दै आएको छ । केबलकार निर्माण स्थलमा पछिल्लो समय झडपसमेत हुँदै आएको छ ।
