सर्लाहीमा मापसे चेक गर्दा प्रहरीमाथि आक्रमण, पाँच राउण्ड हवाई फायर
सर्लाही । सर्लाहीमा झडप नियन्त्रण गर्न प्रहरीले पाँच राउण्ड हवाई फायर गरेको छ । सर्लाहीको रामनगर गाउँपालिका–५ स्थित वैजनाथ चोकमा मापसे चेकिङमा खटिएको प्रहरीसँग स्थानीय युवाको विवाद भएपछि घटनाले उग्ररुप लिएको हो ।
गएराति करिब ९ बजेतिर बैजनाथ चोकमा इलाका प्रहरी कार्यालय गडहिया डुमरियाका प्रमुख प्रहरी निरीक्षक उज्ववल कार्कीको कमान्डमा भैरहेको मापसे चेकिङका क्रममा विवाद भएपछि युवाहरुले प्रहरीलाई आक्रमण गरेका थिए ।
रामनगर गाउँपालिका–५ का वडाध्यक्ष श्रीनन्दन यादवसहितको टोलीले चेकिङस्थलमा पुगेका थिए ।
वडाअध्यक्षसँगै ठुलोसख्यामा उपस्थित स्थानीयले प्रहरीलाई नै आक्रमण गरेपछि स्थीति नियन्त्रण लिन पाँच राउण्ड हवाई फायर गरिएको मधेश प्रदेश प्रहरीका प्रवक्ता सुवास बोहोराले जानकारी दिए ।
यता वडा अध्यक्ष यादवले भने आफू विवाद छुट्याउन गएको बताएका छन् । साथै उनले प्रहरीले चेकिङका नाममा प्रहरीले स्थानीयसँग रकम मागेको गुनासो आएकोले आफू त्यहाँ पुगेको समेत बताएका छन् ।
