केपी ओलीको निरंकुशता र सत्ताउन्माद मेरो सदस्यता खारेजीको कारण बन्यो : भिम रावल
काठमाडौँ । नेकपा एमालेबाट निकालिएका भिम रावलले केपी शर्मा अोलीको निरंकुश र सत्ता उन्माद आफ्नो पार्टी सदस्यता खारेजीको कारण बनेको बताएका छन् । बुधबार काठमाडौँमा पत्रकार सम्मेलन गर्दै रावलले राष्ट्रको हित, पार्टी एकता, शुसानलाई अंगाल्नेले देशभक्त, समानता र शुसासनको पक्षधारलाई दुत्कार्नु कुनै नौलो नलागेको बताए ।
‘राष्ट्रको हित, सिद्धान्त, आदर्श, जनाधिकार, विधि, पद्धति तथा पार्टी एकतालाई गौण ठान्दै पद र स्रोतका लागि तल्लीन हुनेले देशभक्त, समानता, न्याय, विधि, शुसासन र इमानदारीको पक्षधारलाई दुत्कार्नु मलाई आश्चर्य लागेको छैन ।’, आक्रोशित मुद्रामा रावलले भने, ‘केपी ओलीको त्यस्तै सोच, चरित्र, व्यवहार तथा निरंकुश, स्वेच्छाचारी र तानाशाही सत्ताउन्माद मेरो सदस्यता खारेजीको कारण बनेको छ ।’
त्यस्तै उनले केपी ओली र एमाले पार्टीले गरेको गलत कामलाई प्रश्न उठाउनेहरुमाथि कारबाहीको डण्डा चलाएको बताएका छन् ।
