श्रमजीवी पत्रकार ऐन र रियल टाइम बक्स अफिस कार्यान्वयनको माग
काठमाडौं । चलचित्र पत्रकार संघ नेपालको पाँचौं पूर्ण बैठक १३ बुँदे चितवन घोषणापत्र जारी गर्दै सकिएको छ । तीन दिनसम्म चितवनमा बसेको बैठकले श्रमजीवी पत्रकार ऐनको पूर्ण कार्यान्वयनको मागसहितको घोषणापत्र जारी गरेको हो ।
बैठकले संघको दोस्रो राष्ट्रिय भेला आउँदो चैतमा गर्ने निर्णय गरेको महासचिव रघुनाथ सापकोटाले बताए । बैठकमा चलचित्र विकास बोर्डका अध्यक्ष दिनेश डिसीसँग अन्तरक्रिया गरिएको थियो ।
‘मोफसलमा नेपाली फिल्मको बजार र चलचित्र पत्रकारको सम्बन्ध’ विषयक अन्तरक्रियामा बोर्ड अध्यक्ष डिसी, देशभरबाट प्रतिनिधित्व हुने गरी ५० जना फिल्म रिपोर्टिङ गर्ने पत्रकार र चितवनस्थित सिनेमा हलका सञ्चालक सहभागी थिए । कार्यक्रममा मोफसलको पत्रकारिता र मोफसलका हल सञ्चालकबारे पनि छलफल गरियो ।
चितवन घोषणापत्रमा समेटिएका मुख्य बुँदा
– चलचित्र पत्रकारहरूको हक र अधिकारको संरक्षणका लागि संघ गोलबद्ध भएर अघि बढ्ने निर्णय । यसले पत्रकारको व्यावसायिक मान्यता र सुरक्षा सुनिश्चित गर्नेछ । साथै चलचित्र पत्रकारका लागि कार्यशाला, गोष्ठी, अध्ययन भ्रमण र तालिमको व्यवस्थापनका लागि सहकार्य, सहयोग र आयोजना गर्न सम्बन्धित पक्षसँग यो बैठक माग गर्दछ ।
– चलचित्र पत्रकारिता पेशामा जिम्मेवारी र प्रोत्साहन बढाउन, चलचित्र पत्रकारिता पुरस्कार र सम्मान कोषको स्थापना गरिएको छ । साथै संघको कोषको सहयोगार्थ च्यारिटी कार्यक्रमको आयोजना गर्ने र कोषमा सहयोग गर्न सबै पक्षसँग संघ अपील गर्दछ ।
– विधागत पत्रकारितामा विभिन्न समस्या, चुनौती र सम्भावना उत्तिकै रूपमा देखिएको छ । पछिल्लो समय चलचित्र पत्रकारितामा देखिएको विकृति र विसंगतिलाई हटाउँदै मर्यादित र जिम्मेवार रूपमा व्यावसायिक पत्रकारिता गर्न यो बैठक सम्पूर्ण चलचित्र पत्रकारमा अनुरोध गर्दछ ।
– बिट पत्रकारिताको समस्या सम्बोधन गरी यसको संरक्षण र प्रवर्द्धनका लागि विशेष योजना बनाई कार्यान्वयन गर्न यो बैठक सम्बन्धित निकायसँग माग गर्दछ ।
– अनलाइन पत्रिका तथा बिट पत्रकारितालाई पनि लोककल्याणकारी विज्ञापनले समेट्न यो बैठक माग गर्दछ । साथै चलचित्र पत्रकारिता मात्रै गर्ने स्वरोजगारमूलक मिडियालाई चलचित्र विकास बोर्डले समन्वय र सहकार्य गरी संरक्षण गर्न यो बैठक चलचित्र विकास बोर्डसँग माग गर्दछ ।
– स्वायत्त चलचित्र उद्योग र नेपाली चलचित्रको विकास र प्रवर्द्धनका लागि २०२६ सालको ऐनलाई प्रतिस्थापन गर्न बनेको प्रस्तावित चलचित्र ऐन सबै स्टेकहोल्डरलाई प्रभावकारी हुनेगरी तत्काल ल्याउन यो बैठक नेपाल सरकार समक्ष माग गर्दछ ।
– सिनेमा पर्यटन प्रवर्द्धनको मुख्य आधार हो । यसर्थ नेपाली सिनेमाको माध्यमबाट पर्यटन प्रवर्द्धनका लागि प्रभावकारी कार्यक्रम तय गर्न यो बैठक सबै तहका सरकार र सम्बन्धित निकायसँग जोडदार माग गर्दछ ।
– नेपाली कला, संस्कृति र पहिचानसहितको मौलिक चलचित्र तथा अन्तर्राष्ट्रिय रुपमा प्रतिनिधित्व गर्ने नेपाली चलचित्र वा चलचित्रकर्मी र महोत्सवहरुमा जाने चलचित्र तथा चलचित्रकर्मीलाई प्रोत्साहन, प्रवर्द्धन तथा प्रचारप्रसार गर्न यो बैठक सम्बन्धित निकायसँग माग गर्दछ ।
– श्रमजीवी पत्रकार ऐनको पूर्ण कार्यान्वयनको लागि यो भेला माग गर्दछ ।
– चलचित्र पत्रकार संघ नेपाललाई हरेक आर्थिक वर्षमा सहुलियत अनुदान रकममा वृद्धि गर्दै उपलब्ध गराउन सञ्चार मन्त्रालयसहित केन्द्रीय, प्रदेश तथा स्थानीय सरकार र सम्बन्धित पक्षसँग यो बैठक माग गर्दछ ।
– नेपाली चलचित्रको समस्याको रूपमा रहेको ‘रियल टाइम बक्स अफिस’लाई पूर्णरूपमा कार्यान्वयन गर्न यो बैठक माग गर्दछ । साथै बक्स अफिस रिपोर्टलाई सूचनाको हक अनुसार सार्वजनिक गर्न पनि अनुरोध गर्दछ ।
– चितवनको विभिन्न पर्यटकीय क्षेत्र सुन्दर नगरीको प्रवर्द्धनका लागि नेपाली सिनेमामार्फत प्रस्तुत गर्न तीनै तहका सरकारले सिनेमा पर्यटनका कार्यक्रमलाई अगाडि सार्न यो बैठक माग गर्दछ । साथै सिनेमा पर्यटनको प्रवर्द्धनका लागि स्थानीय सरकारलाई नेपाली चलचित्रको छायांकनका लागि सहुलियत प्रदान गर्न यो बैठक माग गर्दछ ।
