एक महिनासम्म हस्ताक्षर अभियान चलाउन माओवादीको निर्देशन
काठमाडौँ । प्रमुख प्रतिपक्ष दल नेकपा माओवादी केन्द्रले प्यालेष्टिनीमाथि इजरायली जनसंहारविरुद्ध प्रमुख सहरमा एक महिना हस्ताक्षर अभियान चलाउन निर्देशन दिएको छ । महासचिव देव गुरुङले पुस १ देखि एक महिनासम्म हस्ताक्षर अभियान चलाउन पार्टीका सबै जवस र मोर्चा सङ्गठनलाई निर्देशन दिएका हुन् ।
गत मङ्सिर २७ गते बसेको प्यालेष्टिनीमाथि इजरायली जनसंहार विरुद्ध संयुक्त अभियानको बैठकले मङ्सिर २५ गते रत्नपार्कस्थित शान्तिबाटिका हस्ताक्षर अभियान सुरु गर्ने निर्णय गरेको थियो । हस्ताक्षर अभियानमा पूर्वप्रधानमन्त्री एवं माओवादीका अध्यक्ष प्रचण्ड सहित, पूर्व प्रधानमन्त्रीहरू माधवकुमार नेपाल, डा.बाबुराम भट्टराई लगायत विभिन्न दलका शीर्ष नेताहरू सहभागी भएका थिए ।
यस कार्यक्रममा सत्ताधारी कांग्रेस, एमाले, जनमत पार्टी र विपक्षी रास्वपा र राप्रपाका नेताहरू सहभागी थिएनन् । सोही निर्णय कार्यान्वयन गर्नका लागि प्रदेश राजधानी लगायत देशका प्रमुख सहरमा हस्ताक्षर अभियान चलाउन महासचिव गुरुङले परिपत्र नै पठाएका छन् ।
‘उक्त अभियान प्रदेशका राजधानी लगायतका प्रमुख सहरहरूमा र पार्टीका सबै जवस/ मोर्चा संगठनहरूको कार्यालयमा पनि उक्त हस्ताक्षर अभियान पुष १ गतेदेखि १ महिनासम्म सञ्चालन गर्न निर्देशन गरिन्छ । यसै साथ हस्ताक्षर अभियानको ब्यानर र हस्ताक्षर फारमको नमुना पठाइएको छ । सोही अनुसार गर्नु गराउन हुन निर्देशन गरिन्छ’, परिपत्रमा उल्लेख छ ।
देशव्यापी अभियान चलाउनुको उद्देश्यबारे थप प्रस्ट पार्दै महासचिव गुरुङले भने–‘इजरायलले संयुक्त राष्ट्रसङ्घको बडापत्र, अन्तर्राष्ट्रिय कानुन, मानव अधिकारको गम्भीर उल्लङ्घन गरेकाले इजरायलमाथि दबाब दिन हामीले हस्ताक्षर अभियान चलाएका हौँ । अन्तर्राष्ट्रिय फौजदारी अदालत (आइसीसी) ले इजरायलका प्रधानमन्त्री बेन्जामिन नेतन्याहुविरुद्ध पक्राउ पुर्जी जारी गर्दा समेत उनले प्यालेष्टाइनीमाथिको जनसंहार रोकेका छैनन् । शान्ति सेनालाई समेत प्रवेश रोक लगाएका छन् । नरसंहार विरुद्ध दबाब दिन नागरिक समाजको अगुवाइमा संयुक्त हस्ताक्षर चलाउन निर्देशन दिएको हो ।’
गुरुङले उद्देश्य मध्यपूर्वमा शान्ति स्थापना गरी मानवताको रक्षा गर्नु रहेको स्पष्ट पारे । यस अभियानमा सत्ताधारी कांग्रेस, एमाले, जपा, विपक्षी रास्वपा र राप्रपा बाहेक सबै दल सहभागी भएको उनको भनाइ छ । जनसंहारविरुद्ध देशभर हस्ताक्षर गरेर नेपाल स्थित संयुक्त राष्ट्र सङ्घीय कार्यालयमा कार्यक्रम रहेको उनले बताए ।
गत असोजमा दक्षिण इजरायलको द्वन्द्वग्रस्त क्षेत्र सेदोत नेगेभको किवुज अलुमिनमा हमासको आक्रमणमा परी १० जना नेपाली विद्यार्थीसहित एक हजार २०० जनाले ज्यान गुमाएका थिए । सोही आक्रमणमा परी घाइते भएका कञ्चनपुरका विद्यार्थी विपिन जोशी अहिलेसम्म बेपत्ता रहेका छन् । त्यसयता इजरायली हमलामा गाजा क्षेत्रमा झन्डै ५० हजार मानिसको मृत्यु भएको अन्तर्राष्ट्रिय सञ्चार माध्यमले जनाएको छ ।
