सोधपुछ गर्न प्रहरी प्रमुख बसन्त कुँवरलाई मानव अधिकार आयोगले बोलायो
काठमाडौँ । राष्ट्रिय स्वतन्त्र पार्टी (रास्वपा) का सभापति रवि लामिछानेमाथि चितवनमा प्रहरीले गरेको अमानवीय व्यवहारको राष्ट्रिय मानवअधिकार आयोगले छानबिन थालेको छ । रविमाथि हिरासतमा अमानवीय व्यवहार गरेको विषयमा सोधपुछ गर्न राष्ट्रिय मानव अधिकार आयोगले आज प्रहरी महानिरीक्षक बसन्त कुँवरलाई आयोगमा बोलाएको छ ।
आयोगका प्रवक्ता डा।टीकाराम पोखरेलले दिउँसो १२ः३० मा कुँवरलाई आयोगमा उपस्थित हुन पत्र काटिएको बताए । ‘कुँवरलाई आज सोधपुछका लागि बोलाइएको छ,’ पोखरेलले भने,‘अब आवश्यकताका आधारमा चितवनका जिल्ला प्रहरी प्रमुखलाई पनि आयोगमै बोलाएर जवाफ माग्ने तयारी गरिरहेका छौँ ।’
सहकारी प्रकरणमा अनुसन्धानका लागि चितवन लगिएका लामिछानेलाई कुँवरको ठाडो निर्देशनमा मंसिर १९ गते मध्यराति १२ः ०५ मा पोखराका लागि हिँडाइएको थियो । दिनभर बयान सकेर आराम गरिरहेका लामिछानेलाई परिवारलाई समेत जानकारी नदिई पोखरा लगिएको थियो ।
