संसद् अधिवेशनका लागि सांसदहरू नै तयार देखिनुहुन्न : सभामुख घिमिरे
काठमाडौँ : सभामुख देवराज घिमिरेले सरकारले आफ्नो आवश्यकता हेरेर मात्रै कानूनमाथि छलफल गर्ने परिस्थिति अन्त्य गर्नुपर्ने बताएका छन्।
मंगलवार ललितपुरमा भएको सभामुखसहित समिति सभापतिहरूसँगको अन्तरसंवादमा बोल्दै सभामुख घिमिरेले यस्तो बताएका हुन्। उनले संसद् कानून बनाउने थलो भए पनि वर्तमान संसद्ले कानून बनाउन नसकेको स्वीकार गरे। उनले संसद्मा कानून ल्याउँदा सरकारले आफ्नो आवश्यकता, अध्ययन, बुझाइबाट ल्याउने र त्यही आधारमा संसद्मा छलफल गर्ने स्थिति रहेको भन्दै त्यसलाई अन्त्य गर्न जरुरी रहेको उल्लेख गरे।
उनले सरकारले कानून उत्पत्ति गर्दै सांसदहरूको सहभागिता बनाउने प्रबन्ध गर्न आवश्यक रहेको बताए। उनले आगामी संसद् अधिवेशन कहिले बोलाउने भन्ने विषय सांसद्हरूको भूमिकामा निर्भर हुने बताए। उनले अहिले सांसदहरू नै संसद् अधिवेशनका लागि तयार नदेखिएको बताए। उनले समितिहरूले संसद्मा पेश भएका विधेयकलाई फूल हाउसमा लैजाने गरी तयारी गरी संसद् अधिवेशन छिटो बोलाउन दबाब दिनुपर्ने माग गरे।
सभामुख घिमिरेले भने, ‘कानून उत्पत्ति गर्दै सांसदहरूको संलग्नता कसरी गर्ने भन्ने हाम्रोमा प्रबन्ध भएको छैन। कानून आयोग छ। कानून आयोगलाई कानूनी अध्ययन गर्ने, संशोधन र नयाँ कानून बनाउने जिम्मा दिएको छ। त्यहाँ बजेट अभाव छ। कानून आयोगले पनि संसदहरूसँग समन्वय गरेर काम गर्ने प्रबन्ध गरिनुपर्छ। आगामी संसद् अधिवेशन कहिले बोलाउने भन्नेमा पनि संसद्हरूको भूमिकामा निर्भर हुनुपर्छ तर सांसदहरू तयार छैनौँ।’
उनले संसद्को गरिमा उच्च रहेको र सांसदको भूमिका महत्त्वपूर्ण रहेको भन्दै सांसदहरूले संसद्लाई कम ठानेर नलाग्न सांसद्हरूलाई आग्रह गरे। उनले सांसदहरूले आफ्नो उचाइबाट सरकारलाई हेर्न सक्नुपर्ने बताए।
