चिर्पट प्रहारबाट देउरानीको हत्या
चिर्पट प्रहारबाट बैतडीमा एकजनाको हत्या भएको छ।
मृत्युु हुनेमा जिल्लाको डिलाशैनी गाउँपालिका–२ छेपट्टकी २३ वर्षीया सुनिता बोहरा रहेकी छन्। सुनितालाई उनकी जेठानी ३० वर्षीया दिपा बोहराले चिर्पटले हिर्काएर हत्या गरेकी हुन्।
घरायसी विवादका कारण दिपाले सुनिताको टाउकोमा चिर्पटले हिर्काएको र उनको घटनास्थलमै मृत्यु भएको बैतडीका प्रहरी प्रवक्ता,प्रहरी निरीक्षक बलराम पाण्डेयले जानकारी दिए।
सोमबार राति ८ बजेको समयमा जेठानी दिपाले घरायसी विवादका क्रममा देउरानी सुनिताको टाउकोमा हिर्काएको र उनको घटनास्थलमै मृत्यु भएको प्रारम्भिक जानकारी आएको प्रहरीको भनाइ छ।
घटनालगत्तै इलाका प्रहरी कार्यालय पाटनबाट प्रहरी निरीक्षक राजेन्द्र साउँदको नेतृत्वमा प्रहरी टोली घटनास्थलमा खटिएको छ। चिर्पटले हानेर देवरानीको हत्या गर्ने दिपालाई प्रहरीले नियन्त्रणमा लिइसकेको प्रहरी निरीक्षक पाण्डेयले बताए।
घटनाका विषयमा विस्तृत अनुसन्धान भइरहेको र घटनास्थल बुझ्ने कार्य भइरहेको जिल्ला प्रहरी कार्यालय बैतडीले जनाएको छ।
