सुप्रिम सहकारी ठगी प्रकरणमा ४० जना मुछिए, थुनामै रहेकालाई समेत पक्राउ पुर्जी !

सुप्रिममा रवि र छवि कति रकममा मुछिए  ?

देशमा  विभिन्न सहकारीको रकम अपचलनमा मुछिएका रवि लामिछाने र छविलाल जोशी बुटवलको सुप्रिम सहकारी रकम संगठीत ठगी गरेको मुद्दामा प्रहरीले पक्राउ गर्ने अनुमति पाएको हो।  यद्यपि उनीहरू  पक्राउ नै परि सकेकोले अनुसन्धानको लागि कास्कीबाट रुपन्देही ल्याउनको लागि  कानुनले बाटो छेकेको थिएन ।

बुटवलको सुप्रिम सहकारीबाट  १४ करोड २९ लाख ३६ हजार रुपैयाँ गोर्खा मिडियामा गएको सूर्य थापा नेतृत्वको संसदीय छानबिन विशेष समितिको प्रतिवेदनमा उल्लेख गरिएको छ ।

उक्त  मिडियाको अध्यक्ष जीवी राई हुन् भने जोशी पूर्वउपाध्यक्ष हुन् । जसमा जोशीको नामबाट २ करोड ५० लाख रुपैयाँ र रविको नामबाट २ करोड रुपैयाँ गोर्खा मिडिया नेटवर्कमा गएको देखिएको छ ।

गोर्खा मिडिया नेटवर्कले ११ फागुन २०७७ मा ग्यालेक्सी टिभी सञ्चालनमा ल्याएको थियो । गोर्खा मिडिया नेटवर्कमा सुरुमा गितेन्द्रबाबु राई र छविलाल जोशी शेयर सदस्य थिए । त्यस बेला राई र जोशीको समान २ लाख ५० हजार कित्ता शेयर थियो ।

टिभी सञ्चालनमा आएको वर्ष दिन नपुग्दै ७ पुस २०७८ मा लामिछाने १ लाख ८० हजार कित्ता शेयरसहित प्रबन्ध निर्देशक बनेका थिए । त्यो बेला राईसँग ८० प्रतिशत (१० लाख २० हजार कित्ता) र रविसँग १५ प्रतिशत शेयर थियो । त्यस्तै कुमार रम्तेल, भूपेन्द्रबाबु राईलगायतको पनि शेयर रहेको थियो ।

सुप्रिम सहकारीको रकम गैर कानुनी रूपमा सारिएको विषयमा जोशीसँग यसअघि नै  रुपन्देहीमा दुई दिन बयान लिएर पोखरा पठाइएको छ ।

रवि अहिले पोखरामा सूर्य दर्शन सहकारीको रकम ठगीमा अनुसन्धानमा छन् । उनलाई प्रहरीले छिट्टै रुपन्देही ल्याएर सुप्रिम सहकारी विषयमा अनुसन्धान गर्ने तयारीमा रहेको छ । अन्य अदालतले पुर्जी जारी भएकालाई पनि पक्राउ गरेर अनुसन्धान गर्ने जिल्ला प्रहरी कार्यालय रुपन्देहीले जनाएको छ ।