उपसभामुखलाई हटाउने कदम चालिए हाम्रो शक्ति देखाउँछौँ : रास्वपा
राष्ट्रिय स्वतन्त्र पार्टीले उपसभामुख इन्दिरा रानालाई हटाउने कदम चालिए प्रतिकार गर्ने बताएको छ
उपसभामुख इन्दिरा रानामाथि सत्तारुढ दलहरुले संसदसँग असम्बन्धित व्यक्तिलाई अमेरिका लैजान लागेको आरोप लगाउँदै राजीनामा माग गरेपछि राष्ट्रिय स्वतन्त्र पार्टीले आफूहरु प्रतिवाद गर्न तयार रहेको बताएको हो।
बुधबार सिंहदरबारस्थित संसदीय दलको कार्यालयमा बसेको सचिवालय बैठकपछि सञ्चारकर्मीहरुसँग कुराकानी गर्दै कार्यवाहक प्रवक्ता मनिष झाले उपसभामुखको कदम गलत भए पनि स्पष्टिकरणको मौका दिनुपर्ने बताए।
उनले १८ महिना अगाडीको प्रकरण अहिले निकालिएको भन्दै अहिले निकाल्नुको कारणबारे सत्तारुढ दलहरुलाई प्रश्न गरे। उनले आफूहरु सत्तारुढ दलहरुको आगामी कदमहरुलाई नियालिरहेको भन्दै उनीहरुको कदमअनुसार आफ्नो कदम निर्धारण गर्ने बताए।
उनले भने ‘१८/१९ महिना पहिला एउटा पत्रमा उहाँको हस्ताक्षर देखियो जुन पत्र सम्बन्धित मन्त्रालयमा दर्ता पनि भएको छैन। सम्बन्धित ठाउँमा पुगेको पनि छैन। भिसाको लागि अनुरोध पत्र थिएन। अन्तर्वाताको लागि अनुरोध पत्र थियो।
तर त्यसलाई १८ महिनासम्म दबाएर, लुकाएर किन राखियो? आज आएर गलत भएको हो र? छानविन गर्न सकिन्छ। उहाँलाई स्पष्टिकरण दिने मौका दिनुपर्छ।
त्यसकारण हामी छलफल मात्रै गरिरहेका छौँ। यो नै निर्णय हो भन्ने निष्कर्ष सुनाउनुपर्ने अवस्था आएको छैन। उहाँहरुले कस्तो कदम लिनुहुन्छ त्यस अनुसार छलफल गर्नेछौँ।
पर्ख र हेर को अवस्थामा छौँ। तर अर्को कुरा सरोकार छ, आक्रामक रुपमा हामी तयार छौँ। आएको परिस्थितिलाई कसरी सामना गर्ने, त्यसलाई कसरी प्रतिकार गर्ने र कसरी त्यसमा हामीले कार्य गर्ने भन्नेकुरामा पूर्ण तयारी र सरोकार छ।’
उनले आफूहरु उपसभामुखको रक्षाका निम्ति तयारी अवस्थामा रहेको बताए।
