कांग्रेस महामन्त्री शर्माको प्रश्न : रास्वपाको शब्दकोशमा नैतिकता छ की छैन ?
काठमाडौँ । प्रमुख प्रतिपक्षी नेपाली कांग्रेसका महामन्त्री विश्वप्रकाश शर्माले गृहमन्त्री रवि लामिछानेमाथि नैतिकताको प्रश्न उठाएका छन् । बिहीबार काठमाडौँमा नेपाल महिला सङ्घद्वारा आयोजित कार्यक्रममा शर्माले लामिछानेमा नैतिकताको खडेरी देखिएको टिप्पणी गरेका हुन् ।
सहकारी प्रकरण ठगीमा संसदीय विशेष छानबिन समिति बन्दा पनि गृहमन्त्री लामिछानेले राजीनामा नदिएको भन्दै महामन्त्री शर्माले प्रश्न उठाए । ‘अहिले नैतिकताको खडेरी परेको छ, नयाँ दल आउँदै गर्दा त हामीलाई प्रश्न गरिनुपर्ने, संसदीय छानबिन समिति बन्यो, कुनैबेला समिति बन्दै गर्दा तत्कालीन अर्थमन्त्री डा रामशरण महत, जनार्दन शर्माले राजीनामा दिनुभयो,’ उनले भने, ‘अहिले पनि समिति बनेको छ तर गृहमन्त्रीले राजीनामा दिनुभएन ।’
गृहमन्त्री लामिछानेमा नैतिकताको खडेरी देखिएपनि कांग्रेसले राजीनामा नमागेको उनको भनाइ थियो । यस्तै उनले राष्ट्रिय स्वतन्त्र पार्टी (रास्वपा)को शब्दकोशमा नैतिकता छ कि छैन भन्दै प्रश्न गरे । ‘हामी जान्दछौँ नयाँ दलको डिसनेरी (शब्दकोश)मा प्रश्न र आवेग छ केही गरौँला भन्ने ऊर्जा पनि छ । तर, आवेग र आक्रोश भएजस्तै नैतिकता छ कि छैन ? हामी सोध्न चाहँदैनौँ ,’ महामन्त्री शर्माले भने ।
रास्वपा सभापति लामिछानेको शब्दकोशमा नैतिकता छ कि छैन भनेर पार्टीभित्र प्रश्न नउठेको महामन्त्री शर्माले बताए ।
