सभामुखले बोलाएको बैठकमा कांग्रेसले भन्योः संसदीय छानबिन समिति न्यूनतम माग हो
नेपाली कांग्रेसले संसदीय छानबिन समितिबाट पछि नहट्ने अडान लिएको छ । प्रतिनिधि सभाको बैठक हुनु एक दिन अघि सभामुख देवराज घिमिरेले बोलाएको दलका नेताहरुको बैठकमा कांग्रेसले संसदीय छानबिन समितिको माग दोहोर्याएको हो ।
कांग्रेसले गृहमन्त्री रवि लामिछाने सहकारीको रकम अपचलनमा मुछिएको भन्दै छानबिनका लागि संसदीय छानबिन समितिको माग गर्दै आएको छ । कांग्रेसको मागका बारेमा छलफल गर्न सभामुख घिमिरेले कांग्रेस, एमाले, माओवादी केन्द्र र राष्ट्रिय स्वतन्त्र पार्टीका शीर्ष नेताहरु छलफलमा डाँकेका थिए ।
संसदीय छानबिन समिति न्युनतम माग रहेको तर त्यसलाई मान्न सरकार तयार नभएका प्रमुख सचेतक रमेश लेखकले बताए । ‘अब संसदमा कुनै बैठकका काम कारबाही अवरुद्ध भए भने त्यसको जिम्मेवार सरकारले लिनुपर्दछ,’ लेखकले भने । भोलि संसदमा सरकार कुन रुपमा प्रस्तुत हुन्छ त्यसै अनुसार कांग्रेस प्रस्तुत हुने बताए ।
कांग्रेसका प्रमुख सचेतक लेखकले आफ्ना कुराहरु यथावत राखेको बताए । ‘लाखौं लाख नेपालीहरुको पैसा सहकारीहरुमा बचत गरिएको छ । देशका विभिन्न सहकारीहरुमा रकमको अपचलन गर्ने, दुरुपयोग गर्ने, ठगि गर्ने लगायतका काम भएका छन्,’ लेखकले बैठक पछि भने ।
रकम अपचलनमा बहालवाला मन्त्रीको कुरा उठिरहेको लेखकले बताए । कांग्रेसले संसदीय छानबिन समिति माग गरिरहेको लेखकले बताए । ‘हामीले हाम्रो कुरा स्पष्ट राखेका छौं । अहिलेसम्म हामी सदसयतापूर्वक प्रस्तुत भएका छौं,’ लेखकले भने,‘आफ्नो माग निरन्तर राखेका छौं । संसदलाई अवरोध गरेका छैनौं ।’
सरकार गैरजिम्मेवार तरिकाले प्रस्तुत हुँदै गएको उनले बताए । विचल्लीमा भएका नागरिकका विषयमा सरकार गम्भीर नभएको लेखकले आरोप लगाए ।
