यस्तो छ रास्वपाका सदस्यले पालना गर्नुपर्ने आचारसंहिता : गुटबन्दी गर्न निषेद
राष्ट्रिय स्वतन्त्र पार्टी (रास्वपा) ले पार्टी सदस्यले पालना गर्नुपर्ने आचारसंहिता पास गरेको छ । महामन्त्री मुकुल ढकालका अनुसार रास्वपाले आचारसंहितामा गुटबन्दी गर्न बन्देज लगाएको छ ।
‘पार्टी सदस्यले सामूहिक रूपमा माग राख्न पाउने छैनन् । आफूलाई चित्त नबुझेको कुरा व्यक्ति-व्यक्तिले दिनुपर्यो । सामूहिक रूपमा माग राख्न पाइँदैन,’ उनले भने ।
सामूहिक रूपमा माग राख्ने कुरालाई गुटगत गतिविधिको रूपमा व्याख्या गरिएको छ । पार्टी सदस्यहरूले पार्टीको छविमा आँच आउने अभिव्यक्ति दिन पनि नपाइने व्यवस्था गरिएको ढकालले बताए ।
‘पार्टी जिम्मेवारीमा बसेकाहरूले पार्टीमा फरक मत राख्न पाइयो । तर यो पार्टी खतम भयो । यो पार्टी पनि उस्तै हो भनेर बोल्न पाइने छैन,’ उनले भने ।
पार्टीबाट अनुमति लिएर मात्र विदेशीसँग भेटवार्ता गर्न पाइने भन्दै नभए कारबाही हुने कुरा आचारसंहितामा उल्लेख छ । केन्द्रीय समितिको निर्णयविना राजनीतिक भागबन्डामा सामेल हुन नपाइने महामन्त्री ढकालले बताए ।
उनका अनुसार केन्द्रदेखि वडा तहसम्म केन्द्रीय समितिको अनुमतिविना कुनै पनि भागबन्डामा सामेल हुन छुट छैन । पार्टीका केन्द्रीय पदाधिकारीदेखि सदस्यसम्मलाई एउटै व्यवस्था लागू हुने गरी आचारसंहिता पास गरिएको उनको भनाइ छ ।
पार्टीको अनुशासन समितिका संयोजक भरतमणि देवकोटाले तयार पारेको पार्टी सदस्यले पालना गर्नुपर्ने आचारसंहितालाई केन्द्रीय समितिले केही हेरफेर गरेको छ ।
