आजदेखि गभर्नर अधिकारी नियमित काममा फर्किदै
सर्वोच्च अल्पकालीन अन्तरिम आदेश भएसँगै नेपाल राष्ट्र बैङ्कका गभर्नर महाप्रसाद अधिकारी आज देखि नियमित काममा फर्किदै छन् ।
गभर्नर अधिकारीले सर्वोच्चको अल्पकालीन अन्तरिम आदेशअनुसार आजबाट नियमित काममा फर्किने प्रतिक्रिया दिएका छन् ।
२४ चैतको मन्त्रिपरिषद् बैठकको निर्णय अनुसार २५ चैतबाट निलम्बनमा परेका अधिकारीलाई राष्ट्र बैङ्क फर्किने बाटो मंगलबार सर्वोच्च अदालतले खुलाइदिएको थियो ।उनी १२ दिनपछि कार्यालय जाँदै छन् ।
न्यायाधीश हरि फुयाँलको एकल इजलासले मंगलबार ‘गभर्नर अधिकारीलाई पदीय जिम्मेवारी पूरा गर्न दिनू’ भनी प्रधानमन्त्री तथा मन्त्रिपरिषद्को कार्यालयका नाममा अल्पकालीन अन्तरिम आदेश दिएको हो ।
मन्त्रिपरिषद्ले गभर्नर अधिकारीलाई निलम्बन गर्दै पूर्व न्यायाधीश भण्डारीको नेतृत्वमा जाँचबुझ समिति बनाएको थियो । तर, सर्वोच्चले योसँग सम्बन्धित कुनै पनि निर्णय कार्यान्वयन नगर्न भनेको हो ।
सर्वोच्चले दुवै पक्षलाई छलफलका लागि १३ वैशाखमा बोलाएको छ ।
