देशभरि ‘राम नवमी’ पर्व मनाइँदै, आज सार्वजनिक बिदा
आज देशभरि चैत्र शुक्ल नवमीका दिन मनाइने ‘राम नवमी’ पर्व श्रद्धा र भक्तिपूर्वक मनाइँदै छ ।मर्यादा पुरुषोत्तम भगवान् रामचन्द्रको सम्झनामा हरेक चैत्र शुक्ल नवमीका दिन राम नवमी पर्व मनाउने गरिन्छ ।
असत्यमाथि सत्यको विजय तथा भगवान् श्रीरामको सम्झनामा मनाइने राम नवमी पर्वका अवसरमा भगवान् रामचन्द्रका मन्दिरहरूमा पूजापाठ गरिन्छ । ‘व्रतार्क’ नामक धर्मग्रन्थका अनुसार आजका दिन व्रत बसी श्रीरामको पूजापाठ र जप ध्यान गर्नाले चिताएको कार्य पूरा हुने र अर्को जन्ममा वैकुण्ठ वास हुने उल्लेख छ ।
त्रेता युगमा आजकै दिन राजा दशरथ र रानी कौशल्यावतीको सुपुत्रका रूपमा विष्णुको अवतारका रूपमा भगवान् श्रीरामको जन्म भएको र त्यही स्मृतिमा पवित्र नदी, ताल तथा कुण्डहरूमा स्नानका साथ व्रत बसी राम गीता पाठ, अध्यात्म, वाल्मीकीय, तुलसीकृत र भानुभक्तीय रामायण वाचन गर्ने र भगवान् रामको पूजा आराधना गरी रातभरि भजन कीर्तन गर्ने परम्परा छ ।
पितृ मातृ भक्त, ठुलालाई आदर र सानालाई माया गर्ने आदर्श पुरुषका रूपमा रामले अयोध्यामा राज्य गरेका उनको शासन काललाई अहिले पनि रामराज्यका रूपमा स्मरण गर्ने गरिन्छ ।
सृष्टिमा दुर्जनको अन्त्य गरी सज्जनको रक्षाका लागि भगवान् विष्णुले रामका रूपमा मनुष्य लोकमा जन्म लिएको बताइन्छ ।
राम नवमीका दिन श्रीरामको व्रत, उपवास गरी पूजा, आराधना गर्नाले यो लोकमा सुख, शान्ति र परलोकमा सद्गति पाइने रामायणलगायत धर्मग्रन्थमा उल्लेख छ ।
आफ्ना पिताको कठोर आज्ञालाई सहजतापूर्वक ग्रहण गरी मानव जातिलाई सत्यको मार्गमा लाग्न प्रेरणा दिएकाले उनको सम्झनामा राम नवमी पर्व मनाउन थालिएको बताइन्छ ।
राम नवमीका अवसरमा बत्तीसपुतलीस्थित श्रीरामचन्द्र मन्दिर, पशुपति आर्यघाट पारिको राम मन्दिर, गोकर्णेश्वर नगरपालिका-९ स्थित आरुवारिमा रहेको राम मन्दिरलगायत देशभरका विभिन्न स्थानमा रहेका राम मन्दिरमा मेला लाग्ने जनाइएको छ ।
राम नवमीको अवसरमा (आइतबार) सरकारले सार्वजनिक बिदा पनि दिएको छ ।
