राष्ट्रपति र प्रधानमन्त्रीबीचको भेटवार्तामा के-के भयो कुराकानी ?
राष्ट्रपति विद्यादेवी भण्डारी र प्रधानमन्त्री शेरबहादुर देउवाबीच भेटवार्ता भएको छ। राष्ट्रपतिलाई भेट्न प्रधानमन्त्री देउवा साढे ४ बजे शितलनिवास पुगेका थिए।
राष्ट्रपतिका प्रमुख स्वकीय सचिव भेषराज अधिकारीले राष्ट्रपति र प्रधानमन्त्रीबीच भेटवार्ता भएको जानकारी दिए। ‘प्रधानमन्त्री नियमित भेटवार्ताका लागि आउनुभएको हो,’ उनले भने।
प्रधानमन्त्री देउवाले आइतबार भारत भ्रमणमा जाने तयारी गरेका थिए। तर, त्यहाँ आयोजना हुने कार्यक्रम नै रद्द भएपछि देउवाको भ्रमण रोकिएको छ। यसबीचमा उनले आफ्नो भेटघाट र अन्य कार्यक्रमलाई निरन्तरता दिएका हुन्।
देउवाको सचिवालयले भने नियमित भेटघाट र समसामयिक पछिल्लो राजनीतिक घटनाक्रमका बारेमा राष्ट्रपतिसँग कुराकानी भएको जानकारी दिएको छ।
