सियरा लिओनमा इन्धन बोकेको ट्याङ्कर दुर्घटनामा परी मृत्यु हुनेको संख्या ९८ पुग्यो
सियरा लिओनमा इन्धन बोकेको ट्याङ्कर दुर्घटना हुँदा मृत्यु हुने मृतकको संख्या ९८ पुगेको छ ।
राजधानी फ्रिटाउनमा शनिबार भएको दुर्घटनामा ९८ जनाको ज्यान गएको हो । अरू ३० जनाको अवस्था गम्भीर छ । उपराष्ट्रपति मोहम्मद जुल्डेह जाल्लोहले अस्पतालमा झण्डै ८० जनाको उपचार भइरहेको जानकारी दिएको अन्तर्राष्ट्रिय सञ्चारमाध्यमले जनाएका छन् ।
उपचार भइरहेका उनीहरूको शरीरका धेरै भाग जलेका छन् । घाइते हुनेमा महिला र बालबालिका पनि छन् । ट्याङ्कर ठोक्किएपछि तेल पोखिएको र आगलागी भएको प्रत्यक्षदर्शीले बताएका छन् । ज्यान गुमाउने र घाइते हुनेहरू दुर्घटनाका बेला घटनास्थलमा रहेका मोटरसाइकल चालक, पैदल यात्री, सडकका व्यापारीलगायत रहेका छन् ।
सियरा लिओनका राष्ट्रपति जुलियस मादा बायोले ठुलो मानवीय क्षति हुने गरी भएको दुर्घटना र आगलागीको घटनाले आफूलाई अति दुखित बनाएको बताए ।
उनले शोक वक्तव्य मार्फत पीडित परिवारलाई सक्दो सहयोग गर्ने आश्वासन पनि दिए ।
