प्रधानन्यायाधीशको राजीनामा माग गर्दै आज पनि कानून व्यवसायीहरुको विरोध
प्रधानन्यायाधीश चोलेन्द्रशम्शेर जबराको राजीनामा माग गर्दै तेस्रो दिन पनि कानून व्यवसायीहरुले विरोध कार्यक्रम गरेका छन् ।
नेपाल बार एशोसिएसनको अगुवाइमा प्रधानन्यायाधीश जबरालाई राजीनामा दिन दिएको पाँच दिने समय सीमाको आज अन्तिम दिन पनि कानुन व्यवसायीहरुले हातमा कालो पट्टी बाँधेर सर्वोच्च अदालत परिसरमा धर्ना दिएका छन् ।
आज सम्म पनि राजीनामा नआए विरोधका थप कार्यक्रम घोषणा गर्ने निर्णय नेपाल बार एशोसिएसनले गरेको छ ।प्रधानन्यायाधीश जबराले विकृति,विसङ्गति, भ्रष्टाचार रोक्न नसकेको र न्यायपालिकाको स्वच्छता, गरिमा कायम राख्न नसकेको भन्दै नेपाल बार एशोसिएसनले उनको राजीनामा माग्दै कात्तिक १४ गतेदेखि एक घण्टा धर्ना दिँदै आएको छ ।
अधिवक्ता ओमप्रकाश अर्यालले प्रधानन्यायाधीश जबराको सम्मानजनक बहिर्गमन भनेकै राजीनामा भएको बताएका छन् । राजीनामा बाहेक अन्य विकल्प नभएको उनको भनाइ छ ।
सर्वोच्च अदालत परिसरमा आज तेस्रो दिनको विरोध कार्यक्रमलाई सम्बोधन गर्दै अधिवक्ता अर्यालले प्रधानन्यायाधीश जबराले राजीनामा नदिए प्रतिवाद गर्ने बताए ।प्रधानन्यायाधीश जबराले भने कसैले माग्दै राजीनामा नदिने अडान राख्दै आएका छन् ।
