नेपालबाट सबैभन्दा बढी निर्यात हुने पाम तेलको व्यापारमा भारतले लगाएको रोक हट्यो
भारतले आयात प्रतिबन्ध लगाएपछि नेपालबाट सबैभन्दा बढी निर्यात हुने पाम तेलको व्यापार डेढ वर्षदेखि ठप्प प्रायः थियो । करिब डेढ एक वर्षपछि भारतले प्रतिबन्ध फुकुवा गरेसँगै नेपालका लागि पाम तेल निर्यात गर्ने बाटो खुलेको छ ।
भारतले २०७६ पुस अन्तिम साताबाट पाम तेलको आयातमा प्रतिबन्ध लगाएको थियो । जतिबेला नेपालबाट निर्यात हुने वस्तुमा पाम तेलको हिस्सा उच्च थियो । डेढ वर्षपछि भारतको डाइरेक्टरेट जनरल अफ फरेन ट्रेडले पाम तेलको आयात खुला गरेको जनाएको छ ।
नेपालमा पाम तेलको उत्पादन नभए पनि व्यवसायीले मलेसिया र इन्डोनेसियाबाट आयात गरेर भारत निर्यात गर्दै आएका थिए । भारतले पाममा प्रतिबन्ध लगाएपछि नेपाली व्यवसायीहरूले अर्जेन्टिना तथा ब्राजिलबाट भटमास आयात गरेर भारत निर्यात गर्दै आएका छन् ।
आर्थिक वर्ष २०७५/७६ र आर्थिक वर्ष २०७६/७७ मा लगातार १८ अर्ब रुपैयाँभन्दा बढीको पाम तेल भारत निर्यात भएको थियो । चालु वर्षमा भने ४२ अर्बभन्दा बढीको भटमासको तेल निर्यात भएको छ । भारतले पाम तेलको आयात खुला गरेसँगै नेपालको निर्यात व्यापार वृद्धिमा सहयोग पुग्ने देखिन्छ ।
