निवर्तमान गृहमन्त्री थापालाई हराउँदै राष्ट्रियसभा सदस्यमा खिमलाल देवकोटा विजयी
बागमती प्रदेशबाट राष्ट्रियसभा सदस्यमा विपक्षी गठबन्धनका डा. खिमलाल देवकोटा विजयी भएका छन् ।
बिहीबार बागमती प्रदेशबाट राष्ट्रियसभा सदस्यका लागि भएको उपनिर्वाचनमा एमालेका उम्मेदवार रामबहादुर थापा बादललाई हराउँदै विपक्षी गठबन्धनको समर्थमा स्वतन्त्र उम्मेदवार बनेका देवकोटा विजयी भएका हुन् ।
राष्ट्रियसभा सदस्यमा निर्वाचित डा. देवकोटाले ५ हजार ८८ मतभारसहित प्राप्त गरे । देवकोटाका निकटतम् प्रतिस्पर्धी एमालेका उम्मेदवार बादलले ४०१४ मतभार मात्रै प्राप्त गरे ।
स्वतन्त्र उम्मेदवार संघीयताविद् डा. देवकोटालाई नेपाली कांग्रेस, माओवादी केन्द्र र जनता समाजवादी पार्टीको समर्थन थियो ।
माओवादी केन्द्र त्यागेर एमाले प्रवेश गरेका बादललाई विजयी गराउन एमालेले ह्वीप जारी गरेको थियो । तर, एमालेका नेता माधव नेपाल समूहका प्रदेशसभा सदस्य, नगरपालिका तथा गाउँपालिकाका प्रमुख र उपप्रमुखले बादललाई मत दिएनन् ।
