आजदेखि चार्टर्ड तथा उद्धार उडानबाहेक अन्तर्राष्ट्रिय उडान बन्द
कोरोना सङ्क्रमणका कारण चार्टर्ड तथा उद्धार उडानबाहेक अन्तर्राष्ट्रिय उडान बन्द भएका छन् । बिहीबार मध्यरातदेखि चार्टर्ड तथा उद्धार उडानबाहेक नेपालबाट हुने अन्य अन्तर्राष्ट्रिय उडानहरू बन्द गरिएको हो ।
कोरोना महामारी नियन्त्रणका लागि सरकारले वैशाख मसान्तसम्म आन्तरिक तथा अन्तर्राष्ट्रिय उडान स्थगित गर्ने निर्णय गरेको थियो ।
नेपाल र भारतबिच ‘एयर बबल’ सम्झौता अनुरूप दुई देशबिच सातामा दुई उडान कायम राख्ने गरी सबै आन्तरिक तथा अन्तर्राष्ट्रिय उडान बन्द भएको नेपाल नागरिक उड्डयन प्राधिकरणले जनाएको छ ।
अघिल्लो वर्ष कोरोनाको पहिलो लहर नेपालमा फैलिएपछि संक्रमण रोकथाम तथा नियन्त्रणका लागि सरकारले चैत ११ देखि देशभर लकडाउन गरेको थियो ।
चैत १० देखि आन्तरिक र अन्तर्राष्ट्रिय दुवै उडान स्थगन गरिएको थियो । महामारी घटेपछि गत भदौ १६ गतेबाट अन्तर्राष्ट्रिय तथा असोज ५ गतेदेखि आन्तरिक उडान सञ्चालनमा ल्याइएको थियो ।
