बैतडीमा जन्ती बोकेको जिप दुर्घटना हुदाँ एक जनाको मृत्यु
सुदूरपश्चिम प्रदेश स्थित बैतडीमा जन्ती बोकेको जिप दुर्घटना हुँदा एक जनाको मृत्यु भएको छ ।उक्त दुर्घटनामा परि दुई जनाको अवस्था गम्भीर रहेको छ ।
सोमबार बिहान ५ः५० बजे पाटन नगरपालिकाको हिरापुर भन्ने स्थानमा कञ्चनपुरको महेन्द्रनगरबाट जन्ती लिएर फर्किँदै गरेको सुदूरपश्चिम प्रदेशको ०१-००१ च ३७७ नम्बरको जीप दुर्घटनामा परेको जिल्ला प्रहरी कार्यालय बैतडीले जानकारी दिएको छ ।
जिप सडकबाट करिब एक सय मिटर तल खसेको छ । घटनास्थल इलाका प्रहरी कार्यालय पाटनबाट १० किलोमिटर टाढा पर्दछ ।
उक्त दुर्घटनामा एक जनाको मृत्यु भएको, दुई जनाको अवस्था गम्भीर रहेको र अन्यको अवस्था सामान्य रहेको जिल्ला प्रहरी कार्यालय बैतडीले जानकारी दिएको छ ।
प्रहरीका अनुसार दुर्घटनामा मृत्यु हुनेमा ५५ वर्षीय देवीलाल जोशी छन् । चालक र अर्का एक जनाको अवस्था भने गम्भीर रहेको प्रहरीले बताउको छ ।
घाइते सबै जनाको अहिले प्राथमिक स्वास्थ्य केन्द्र पाटनमा उपचार भइरहेको छ ।घटनाको कारण खुल्न बाँकी रहेको प्रहरीले बताएको छ ।
